ek alwidai nazm

dhuul se aTe koltār-zada rāsto

maiñ phir ā.ūñgā

āsūda mohabbat kī zindagī kī tarah

tar-o-tāza aur javān āsmān

terī dhulī huī shādāb nīlāhaT ko piine ke liye

shafīq dhartī ke dāman meñ āsūda sabza-e-ḳhud-rau

terī shabnam ke qatroñ se

apne badan ke izmehlāl ko dhone ke liye

maiñ phir ā.ūñgā

ai mere nanhe-munne dost aslam

terī āñkhoñ meñ tairtī huī giilī sharārat ko

hañsāne ke liye

tere kamre kī be-niyāz dīvāroñ se bāteñ karne ke liye

maiñ phir ā.ūñgā

kamre meñ shor machāne vaalī maġhribī havā kī sīmābiyat ko

chhūne ke liye

maiñ phir ā.ūñgā

zohra shīlā aur giitā ke haañ apnī tanhā.ī ko bhulāne ke liye

jaane vaalī ma.asūm laḌkī

terī udāsī ko piine ke liye

maiñ phir ā.ūñgā

maiñ phir ā.ūñgā ki maiñ bhī zamīn kī tarah

ek mehvar par ghuum rahā huuñ

dhul se aTe koltar-zada rasto

main phir aaunga

aasuda mohabbat ki zindagi ki tarah

tar-o-taza aur jawan aasman

teri dhuli hui shadab nilahaT ko pine ke liye

shafiq dharti ke daman mein aasuda sabza-e-KHud-rau

teri shabnam ke qatron se

apne badan ke izmehlal ko dhone ke liye

main phir aaunga

ai mere nanhe-munne dost aslam

teri aankhon mein tairti hui gili shararat ko

hansane ke liye

tere kamre ki be-niyaz diwaron se baaten karne ke liye

main phir aaunga

kamre mein shor machane wali maghribi hawa ki simabiyat ko

chhune ke liye

main phir aaunga

zohra shila aur gita ke han apni tanhai ko bhulane ke liye

jaane wali masum laDki

teri udasi ko pine ke liye

main phir aaunga

main phir aaunga ki main bhi zamin ki tarah

ek mehwar par ghum raha hun