ek aur mashwara

bastiyāñ hoñ kaisī bhī pastiyāñ hoñ jaisī bhī

har tarah kī zulmat ko raushnī kahā jaa.e

ḳhaak Dāleñ manzil par bhuul jaa.eñ sāhil ko

ruḳh jidhar ho paanī kā us taraf bahā jaa.e

mulk bech Dāleñ yā aabrū rakheñ girvī

jaisā hukm-e-hākim ho us tarah kiyā jaa.e

shor meñ sadāoñ ke ajnabī havāoñ ke

kaun sunñe vaalā hai? kis se ab kahā jaa.e!

guftugū pe pahre haiñ har taraf kaTahre haiñ

rāste muayyan haiñ har qadam pe likkhā hai

kis jagah pe ruknā hai! kis taraf chalā jaa.e

dil kī baat kahne kā ik yahī tarīqa hai

chhup ke saarī duniyā se ab gharoñ ke konoñ meñ

aap hī sunā jaa.e aap hī kahā jaa.e

bastiyan hon kaisi bhi pastiyan hon jaisi bhi

har tarah ki zulmat ko raushni kaha jae

KHak Dalen manzil par bhul jaen sahil ko

ruKH jidhar ho pani ka us taraf baha jae

mulk bech Dalen ya aabru rakhen girwi

jaisa hukm-e-hakim ho us tarah kiya jae

shor mein sadaon ke ajnabi hawaon ke

kaun sunne wala hai? kis se ab kaha jae!

guftugu pe pahre hain har taraf kaTahre hain

raste muayyan hain har qadam pe likkha hai

kis jagah pe rukna hai! kis taraf chala jae

dil ki baat kahne ka ek yahi tariqa hai

chhup ke sari duniya se ab gharon ke konon mein

aap hi suna jae aap hi kaha jae