ek aur sal girah

lo tīsvāñ saal bhī biit gayā

lo baal rupahlī hone lage

lo kāsa-e-chashm huā ḳhālī

lo dil meñ nahīñ ab dard koī

ye tiis baras kaise kaaTe

ye tiis baras kaise guzre

āsān savāl hai kitnā ye!

ma.alūm hai mujh ko ye duniyā

kis tarah vajūd meñ aa.ī hai

kis tarah fanā hogī ik din

ma.alūm hai mujh ko insāñ ne

kis tarah se kī taḳhlīq-e-ḳhudā

kis tarah butoñ ko paidā kiyā

ma.alūm hai mujh ko maiñ kyā huuñ

kis vāste ab tak zinda huuñ

ik us ke javāb kā ilm nahīñ

ye tiis baras kaise kaaTe

haañ yaad hai itnā meñ ik din

toffē ke liye royā thā bahut

ammāñ ne mujhe piiTā thā bahut

haañ yaad hai itnā maiñ ik din

titlī kā ta.āqub karte hue

ik peḌ se jā Takrāyā thā

haañ itnā yaad hai maiñ ik din

nīndoñ ke dayār meñ sapnoñ kī

pariyoñ se lipaT kar soyā thā

haañ itnā yaad hai maiñ ik din

ghar vāloñ se apne laḌ-bhiḌ ke

toḌ aayā thā sab rishte-nāte

haañ itnā yaad hai maiñ ik din

jab bahut dukhī thā tanhā thā

ik jism kī aag meñ pighlā thā

haañ ye bhī yaad hai maiñ ik din

sach bol ke pachhtāyā thā bahut

apne se bhī sharmāyā thā bahut

haañ ye bhī yaad hai mujh ko ki maiñ

jab bahut hī be-kal hotā thā

ash.ār bhī likkhā kartā thā

haañ ye bhī yaad hai mujh ko ki maiñ

roTī rozī kī tamannā meñ

baḌā ḳhvār huā is duniyā meñ

haañ aur bhī kuchh hai yaad mujhe

magar is kā javāb kahāñ ye sab

ye tiis baras kaise guzre

ye tiis baras kaise kaaTe

ab is ke javāb se kyā hogā

chalo uTho ki sub.h huī dekho

chalo uTho ki apnā kaam kareñ

chalo uTho ki shahr-e-tamannā meñ

marham DhūñDeñ un zaḳhmoñ kā

jo dil ne abhī tak khaa.e nahīñ

ta.abīr kareñ un ḳhvāboñ kī

jo āñkhoñ ne dikhlā.e nahīñ

un lamhoñ ke hamrāz baneñ

jo ziist meñ apnī aa.e nahīñ

chalo tīsvāñ saal bhī biit gayā

chalo mai chalkā.eñ jashn kareñ

chalo sar ko jhukā.eñ sajde meñ

is umr-e-faromāya kā safar

aadhe se ziyāda ḳhatm huā

lo tiswan sal bhi bit gaya

lo baal rupahli hone lage

lo kasa-e-chashm hua KHali

lo dil mein nahin ab dard koi

ye tis baras kaise kaTe

ye tis baras kaise guzre

aasan sawal hai kitna ye!

malum hai mujh ko ye duniya

kis tarah wajud mein aai hai

kis tarah fana hogi ek din

malum hai mujh ko insan ne

kis tarah se ki taKHliq-e-KHuda

kis tarah buton ko paida kiya

malum hai mujh ko main kya hun

kis waste ab tak zinda hun

ek us ke jawab ka ilm nahin

ye tis baras kaise kaTe

han yaad hai itna mein ek din

toffee ke liye roya tha bahut

amman ne mujhe piTa tha bahut

han yaad hai itna main ek din

titli ka taaqub karte hue

ek peD se ja Takraya tha

han itna yaad hai main ek din

nindon ke dayar mein sapnon ki

pariyon se lipaT kar soya tha

han itna yaad hai main ek din

ghar walon se apne laD-bhiD ke

toD aaya tha sab rishte-nate

han itna yaad hai main ek din

jab bahut dukhi tha tanha tha

ek jism ki aag mein pighla tha

han ye bhi yaad hai main ek din

sach bol ke pachhtaya tha bahut

apne se bhi sharmaya tha bahut

han ye bhi yaad hai mujh ko ki main

jab bahut hi be-kal hota tha

ashaar bhi likkha karta tha

han ye bhi yaad hai mujh ko ki main

roTi rozi ki tamanna mein

baDa KHwar hua is duniya mein

han aur bhi kuchh hai yaad mujhe

magar is ka jawab kahan ye sab

ye tis baras kaise guzre

ye tis baras kaise kaTe

ab is ke jawab se kya hoga

chalo uTho ki subh hui dekho

chalo uTho ki apna kaam karen

chalo uTho ki shahr-e-tamanna mein

marham DhunDen un zaKHmon ka

jo dil ne abhi tak khae nahin

tabir karen un KHwabon ki

jo aankhon ne dikhlae nahin

un lamhon ke hamraaz banen

jo zist mein apni aae nahin

chalo tiswan sal bhi bit gaya

chalo mai chalkaen jashn karen

chalo sar ko jhukaen sajde mein

is umr-e-faromaya ka safar

aadhe se ziyaada KHatm hua