ek awami nazm

ham ḳhālī peT sarhad par

hāthoñ kī amn zanjīr nahīñ banā sakte

bhuuk hamārī rāteñ ḳhushk kar detī hai

aañsū kabhī pyaas nahīñ bujhāte

rajaz qaumī tarāna ban jaa.e

to zarḳhezī qahat ugāne lagtī hai

bachche maañ kī chhātiyoñ se

ḳhuun chūsne lagte haiñ

koī chehroñ pe parcham nahīñ banātā

aur yaum-e-āzādī par log

phul-jhaḌiyāñ nahīñ apnī ḳhushiyāñ jalāte haiñ

fauj kabhī naġhme nahīñ gungunā saktī

ki sipāhī khetiyāñ ujāḌne vaale

ḳhud-kār auzār hote haiñ

kyā phuul nau-biyāhatā aurat ke bāloñ

aur bachchoñ ke libās par hī jachtā hai

kaash

vatan kī had hudūd ke ta.ayyun ke liye

phūloñ kī kiyāriyāñ

āhinī-tāroñ kā mutabādil hotīñ

hum KHali peT sarhad par

hathon ki amn zanjir nahin bana sakte

bhuk hamari raaten KHushk kar deti hai

aansu kabhi pyas nahin bujhate

rajaz qaumi tarana ban jae

to zarKHezi qahat ugane lagti hai

bachche man ki chhatiyon se

KHun chusne lagte hain

koi chehron pe parcham nahin banata

aur yaum-e-azadi par log

phul-jhaDiyan nahin apni KHushiyan jalate hain

fauj kabhi naghme nahin gunguna sakti

ki sipahi khetiyan ujaDne wale

KHud-kar auzar hote hain

kya phul nau-biyahata aurat ke baalon

aur bachchon ke libas par hi jachta hai

kash

watan ki had hudud ke tayyun ke liye

phulon ki kiyariyan

aahini-taron ka mutabaadil hotin