ek baat

mujhe har ik baat kī ḳhabar hai

jo ho chukī hai

jo ho rahī hai

jo hone vaalī hai aaj lekin

maiñ sirf us baat ke bhañvar meñ utar rahā huuñ

jo hone vaalī hai

jis ko sargoshiyoñ kā ik be-karāñ samundar

ugalne vaalā hai

kārvāñ jis kā ab hikāyat kī sar-zamīnoñ pe chalne vaalā hai

jis ko har dāstāñ gale se lagāne vaalī hai

jis kī haañ meñ har ek haañ haañ milāne vaalī hai

aao logo

talab ke sāhil pe ḳhāmushī kī dabīz chādar lapeT kar sone vaale logo

shāyad andoh ke añdhere meñ ḳhauf kī ḳhār-dār chādar lapeT kar rone vaale logo

suno ki jo baat hone vaalī hai us kā āġhāz ho rahā hai

suno ki ye baat aap kī hai

suno kī ye baat ruus aur chiin kī nahīñ hai

vahāñ to us ko hue zamāna guzar chukā hai

ye baat vietnam aur cambodia kī bhī ab nahīñ rahī hai

vahāñ to ab us kī shakl ik dāstāñ kī sūrat meñ Dhal chukī hai

vahāñ se ye baat chal chukī hai

ye baat ab tum karoge tum

jin ke vahm meñ bhī na thā ki ik din

use tumhāre lahū lahū lab adā kareñge

yahī to is baat kā karishma hai mo.ajiza hai

ki ibtidā us kī jab bhī hogī

vahī kareñge

jo intihā ke haqīr hoñge

magar bahut bā-zamīr hoñge

mujhe tumhāre

mujhe tumhāre haqīr aur bā-zamīr hone meñ shak nahīñ hai

ki maiñ bhī tum meñ se ek huuñ aur jāntā huuñ

ki tum jo muddat se ḳhāmushī kī dabīz chādar lapeT kar so rahe ho

kyā ho

ki tum jo andoh ke añdhere meñ ḳhauf kī ḳhār-dār chādar

lapeT kar ro rahe ho kyā huā

suno ki jo baat hone vaalī thī ho rahī hai

maiñ is kā āġhāz kar chukā huuñ

uTho apne lahū lahū lab

mirī sadā ke laboñ pe rakh do

mujhe har ek baat ki KHabar hai

jo ho chuki hai

jo ho rahi hai

jo hone wali hai aaj lekin

main sirf us baat ke bhanwar mein utar raha hun

jo hone wali hai

jis ko sargoshiyon ka ek be-karan samundar

ugalne wala hai

karwan jis ka ab hikayat ki sar-zaminon pe chalne wala hai

jis ko har dastan gale se lagane wali hai

jis ki han mein har ek han han milane wali hai

aao logo

talab ke sahil pe KHamushi ki dabiz chadar lapeT kar sone wale logo

shayad andoh ke andhere mein KHauf ki KHar-dar chadar lapeT kar rone wale logo

suno ki jo baat hone wali hai us ka aaghaz ho raha hai

suno ki ye baat aap ki hai

suno ki ye baat rus aur chin ki nahin hai

wahan to us ko hue zamana guzar chuka hai

ye baat wietnam aur cambodia ki bhi ab nahin rahi hai

wahan to ab us ki shakl ek dastan ki surat mein Dhal chuki hai

wahan se ye baat chal chuki hai

ye baat ab tum karoge tum

jin ke wahm mein bhi na tha ki ek din

use tumhaare lahu lahu lab ada karenge

yahi to is baat ka karishma hai moajiza hai

ki ibtida us ki jab bhi hogi

wahi karenge

jo intiha ke haqir honge

magar bahut ba-zamir honge

mujhe tumhaare

mujhe tumhaare haqir aur ba-zamir hone mein shak nahin hai

ki main bhi tum mein se ek hun aur jaanta hun

ki tum jo muddat se KHamushi ki dabiz chadar lapeT kar so rahe ho

kya ho

ki tum jo andoh ke andhere mein KHauf ki KHar-dar chadar

lapeT kar ro rahe ho kya hua

suno ki jo baat hone wali thi ho rahi hai

main is ka aaghaz kar chuka hun

uTho apne lahu lahu lab

meri sada ke labon pe rakh do