ek daraKHt

us ne apne dil kī kaalī dhartī par ek daraḳht ugāyā thā

pahle is par ummīdoñ ke phal aate the

is kī shāḳheñ ḳhushbuoñ ke pattoñ se bhar jaatī thiiñ

yādoñ kī ḳhushbueñ fazā meñ bikhar jaatī thiiñ

kabhī kabhī rātoñ kī māyūsī kī shabnam

saare daraḳht ko dho detī thī

phūloñ meñ nokīle kāñTe bo detī thī

phir bhī maiñ duniyā kī jaltī dhuup se ghabrā kar

akasr is ke saa.e meñ aa jaatā thā

sukh paatā thā

lekin ab ye daraḳht to jaise sañg-e-safed kā hai

is kī shāḳheñ dūdhiyā dhaat kī haiñ

ab is par TeḌhe-meḌhe maḳhrūtī aur murabba shakloñ vaale

lohe ke phal aate haiñ

is kā saaya garm dahakte añgāroñ kī aag hai

is kī ḳhushbū bahte ḳhuun kā raag hai

mere dil kī miTTī par ab koī daraḳht nahīñ hai naag hai

phan phailā kar baiThā hai aur apne jism ko Dastā hai

jism ab is kā jism nahīñ hai

piile ḳhuun kā rasta hai

us ne apne dil ki kali dharti par ek daraKHt ugaya tha

pahle is par ummidon ke phal aate the

is ki shaKHen KHushbuon ke patton se bhar jati thin

yaadon ki KHushbuen faza mein bikhar jati thin

kabhi kabhi raaton ki mayusi ki shabnam

sare daraKHt ko dho deti thi

phulon mein nokile kanTe bo deti thi

phir bhi main duniya ki jalti dhup se ghabra kar

akasr is ke sae mein aa jata tha

sukh pata tha

lekin ab ye daraKHt to jaise sang-e-safed ka hai

is ki shaKHen dudhiya dhat ki hain

ab is par TeDhe-meDhe maKHruti aur murabba shaklon wale

lohe ke phal aate hain

is ka saya garm dahakte angaron ki aag hai

is ki KHushbu bahte KHun ka rag hai

mere dil ki miTTi par ab koi daraKHt nahin hai nag hai

phan phaila kar baiTha hai aur apne jism ko Dasta hai

jism ab is ka jism nahin hai

pile KHun ka rasta hai