ek din

din kī raushnī meñ raat mil ga.ī

do-ghaḌī jo tere saath jī liye

nashāt ke tamām jaam pī liye

husn ishq aur talab kī hurmateñ

surūr-o-kaif aur sukūñ kī hashmateñ

ridā-e-nūr ban ke taar taar ho ke jism meñ utar ga.iiñ

mā-sivā bikhar gayā

nasha surūr kī hadoñ se paar raushnī kī raah se guzar gayā

din kī tez dhuup meñ

fazā-e-yād ke tamām naqsh

terī merī chāñdnī uḌā ke le ga.ī

maze tamām lazzatoñ ke chand sā.atoñ meñ

yuuñ samā ga.e

ki din kī vus.atoñ pe raat chhā ga.ī

talāsh ke surūr meñ

sarāb kī hadoñ se ham guzar ga.e

hameñ hamārī zaat kā nishāñ milā

hameñ hamārī baat kā gumāñ milā

sāya-e-makāñ meñ lā-makāñ milā

din ki raushni mein raat mil gai

do-ghaDi jo tere sath ji liye

nashat ke tamam jam pi liye

husn ishq aur talab ki hurmaten

surur-o-kaif aur sukun ki hashmaten

rida-e-nur ban ke tar tar ho ke jism mein utar gain

ma-siwa bikhar gaya

nasha surur ki hadon se par raushni ki rah se guzar gaya

din ki tez dhup mein

faza-e-yaad ke tamam naqsh

teri meri chandni uDa ke le gai

maze tamam lazzaton ke chand saaton mein

yun sama gae

ki din ki wusaton pe raat chha gai

talash ke surur mein

sarab ki hadon se hum guzar gae

hamein hamari zat ka nishan mila

hamein hamari baat ka guman mila

saya-e-makan mein la-makan mila