ek faqir ki dua

maiñ māñgne vaalā huuñ

nikal jaatā huuñ kabhī

mandir kabhī masjid kī taraf

girjā aur gurū-dvāre kā chakkar bhī lagā letā huuñ

aaj shahr ke baḌe maidān meñ

baḌī sajāvaT hai

kisī tehvār ke jashn jaisā māhaul hai

hujūm hai bhiiḌ hai sāmān hī sāmān hai

log kah rahe haiñ baḌe mantarī aane vaale haiñ

charchā ye bhī hai ki baḌe dīn-dayālū haiñ

roTī kapḌā aur makān to bahutoñ ne diyā

un ke hāthoñ meñ har dukh kā ilaaj hai

ye to baḌā hī chamatkār hai parbhū

to in ke pichhle janm kā shāyad upkār hai

ai niilī chhatrī vaale

merī bhī ik bintī sun le

zindagī jo merī ghisaT rahī hai

bhuuk ke peT khule āsmān ke nīche kaT rahī hai

agle janam mujhe bhī mantarī banā.iyo

isī shaan aur ThāT-bāT ke

saath har jagah ghumā.iyo

merā to shahr bhī ajnabī hai mere liye

agle janam meñ mujhe bhī saarī duniyā kī sair karā.iyo

ek aadh kapḌoñ hī meñ guzartī hai zindagī merī

agle janam ḳhuub qīmtī kapḌe pahnā.iyo

ai daatā agle janam

mujhe bhī baḌā mantarī banā.iyo

main mangne wala hun

nikal jata hun kabhi

mandir kabhi masjid ki taraf

girja aur guru-dware ka chakkar bhi laga leta hun

aaj shahr ke baDe maidan mein

baDi sajawaT hai

kisi tehwar ke jashn jaisa mahaul hai

hujum hai bhiD hai saman hi saman hai

log kah rahe hain baDe mantari aane wale hain

charcha ye bhi hai ki baDe din-dayalu hain

roTi kapDa aur makan to bahuton ne diya

un ke hathon mein har dukh ka ilaj hai

ye to baDa hi chamatkar hai parbhu

to in ke pichhle janm ka shayad upkar hai

ai nili chhatri wale

meri bhi ek binti sun le

zindagi jo meri ghisaT rahi hai

bhuk ke peT khule aasman ke niche kaT rahi hai

agle janam mujhe bhi mantari banaiyo

isi shan aur ThaT-baT ke

sath har jagah ghumaiyo

mera to shahr bhi ajnabi hai mere liye

agle janam mein mujhe bhi sari duniya ki sair karaiyo

ek aadh kapDon hi mein guzarti hai zindagi meri

agle janam KHub qimti kapDe pahnaiyo

ai data agle janam

mujhe bhi baDa mantari banaiyo