ek ghair-rasmi marsiya

rāñjhā sīna-e-shab meñ

dard kī mish.al raushan kar ke

hiir kī taaza qabr pe jhukā huā baiThā hai

ulTī sāñseñ bhartā rāñjhā ḳhaak se jaane kyā kuchh pūchh rahā hai

lekin jin kānoñ ke chhed abhī bharnā hī shurūa hue hoñ

jin ke jog ko tāza-tāza zañg lagā ho

un kī samā.at kyā hai

apnī bujhtī āñkhoñ se rāñjhā parda-e-arsh ke paar ḳhudā ko dekh ke us par

ġhaiz-o-ġhazab kī ek nigāh girānā chāhtā hai shāyad

lekin jin āñkhoñ meñ ab tak TuuT chuke ik ḳhvāb-e-ḳhush-numā ke kuchh aks ubhar aate hoñ

un kī basīrat kyā hai

apne sūkhe hoñToñ se rāñjhā

nīm-marg ho kar bhī hiir se muāfī talab kartā hai

lekin jis ke hoñT kisī muzhde kī lazzat se abhī puurī tarah judā na hue hoñ

us murde ke hoñT sivā is ke kyā kah sakte the?

zahr piyāla p ke das maiñ moyā jaañ tuuñ moī

rāñjhā rāñjhā kardī

nī tuuñ aape rāñjhā` hoī

ranjha sina-e-shab mein

dard ki mishal raushan kar ke

hir ki taza qabr pe jhuka hua baiTha hai

ulTi sansen bharta ranjha KHak se jaane kya kuchh puchh raha hai

lekin jin kanon ke chhed abhi bharna hi shurua hue hon

jin ke jog ko taza-taza zang laga ho

un ki samaat kya hai

apni bujhti aankhon se ranjha parda-e-arsh ke par KHuda ko dekh ke us par

ghaiz-o-ghazab ki ek nigah girana chahta hai shayad

lekin jin aankhon mein ab tak TuT chuke ek KHwab-e-KHush-numa ke kuchh aks ubhar aate hon

un ki basirat kya hai

apne sukhe honTon se ranjha

nim-marg ho kar bhi hir se muafi talab karta hai

lekin jis ke honT kisi muzhde ki lazzat se abhi puri tarah juda na hue hon

us murde ke honT siwa is ke kya kah sakte the?

zahr piyala p ke das main moya jaan tun moi

ranjha ranjha kardi

ni tun aape ranjha` hoi