ek gap

do gap-bāzoñ ne kal mujh ko

ek kahānī yūñhī sunā.ī

jhuuT hai sach hai rab hī jaane

log purāne ye kahte the

ek zamāna aisā bhī thā

chāñd sitāre sūraj saare

saath rahā karte the

ik din ik nanhe taare kī

sālgirah jo aa.ī

sūraj ne sab

āsmān ke bāshindoñ ko

ghar pe ziyāfat par bulvāyā

cake baḌā sā kahkashāñ ke

ik bāzār se aaya

khiir magar ghar par hī pakegī

aisā ghar meñ tai paayā

chāñd bahut masrūf thā us din

kaam bahut the

sū-e-ittifāq huā kuchh aisā

shakar khiir meñ

bhuul se paḌnī rah ga.ī

bas ye musībat aa.ī

mehmānoñ ke biich huī jab

mister sūraj kī rusvā.ī

sūraj laal bhabhūkā ho kar

pair paTaḳhtā ghar se niklā

vo din hai aur aaj kā din hai

chāñd sitāre

khoj meñ sūraj ke phirte haiñ

raat kī vaadī meñ chalte haiñ

us ke aage din kā sahrā

us meñ sūraj dauḌā dauḌā phirtā hai

donoñ kī ye āñkh-micholī

jaane kab tak yūñhī chalegī

kab ye donoñ mil pā.eñge

do gap-bazon ne kal mujh ko

ek kahani yunhi sunai

jhuT hai sach hai rab hi jaane

log purane ye kahte the

ek zamana aisa bhi tha

chand sitare suraj sare

sath raha karte the

ek din ek nanhe tare ki

salgirah jo aai

suraj ne sab

aasman ke bashindon ko

ghar pe ziyafat par bulwaya

cake baDa sa kahkashan ke

ek bazar se aaya

khir magar ghar par hi pakegi

aisa ghar mein tai paya

chand bahut masruf tha us din

kaam bahut the

su-e-ittifaq hua kuchh aisa

shakar khir mein

bhul se paDni rah gai

bas ye musibat aai

mehmanon ke bich hui jab

mister suraj ki ruswai

suraj lal bhabhuka ho kar

pair paTaKHta ghar se nikla

wo din hai aur aaj ka din hai

chand sitare

khoj mein suraj ke phirte hain

raat ki wadi mein chalte hain

us ke aage din ka sahra

us mein suraj dauDa dauDa phirta hai

donon ki ye aankh-micholi

jaane kab tak yunhi chalegi

kab ye donon mil paenge