ek gaz ki zaban

ishq kā mezbān hai pyāre

husn kī bas ye shaan hai pyāre

terī sheḳhī kā kyā asar hogā

terā āshiq paThān hai pyāre

jo tire husn kā bane ullū

vo baḌā bhāgvān hai pyāre

phīkā pakvān kyoñ na ho āḳhir

terī ūñchī dukān hai pyāre

ishq meñ aur kyā ho habs-e-davām

hijr ḳhud andaman hai pyāre

qad to bālisht-bhar kā hai terā

ek gaz kī zabān hai pyāre

haañ tabī.at harī maiñ kar dūñgā

mere bangle meñ lawn hai pyāre

mujh se achchhā to ġhair hī niklā

jo tirā fēl-bān hai pyāre

tere abbā se hogā interview

kal mirā imtihān hai pyāre

tujh ko mujh se yaqīn-e-tark-e-vafā

aur mujh ko gumān hai pyāre

shauq se khā jo tujh ko aa.e pasand

ye parāThā ye naan hai pyāre

īd-e-qurbāñ pe kī hai qurbānī

le ye bakre kī raan hai pyāre

jis ko kahtā hai tū 'zarīf' zarīf

vo zarāfat kī jaan hai pyāre

ishq ka mezban hai pyare

husn ki bas ye shan hai pyare

teri sheKHi ka kya asar hoga

tera aashiq paThan hai pyare

jo tere husn ka bane ullu

wo baDa bhagwan hai pyare

phika pakwan kyon na ho aaKHir

teri unchi dukan hai pyare

ishq mein aur kya ho habs-e-dawam

hijr KHud andaman hai pyare

qad to baalisht-bhar ka hai tera

ek gaz ki zaban hai pyare

han tabiat hari main kar dunga

mere bangle mein lawn hai pyare

mujh se achchha to ghair hi nikla

jo tera feel-ban hai pyare

tere abba se hoga interwiew

kal mera imtihan hai pyare

tujh ko mujh se yaqin-e-tark-e-wafa

aur mujh ko guman hai pyare

shauq se kha jo tujh ko aae pasand

ye paraTha ye nan hai pyare

id-e-qurban pe ki hai qurbani

le ye bakre ki ran hai pyare

jis ko kahta hai tu 'zarif' zarif

wo zarafat ki jaan hai pyare