ایک حقیقت

کسے مرگ بسملؔ کا احساس ہوگا

وہ بیکس بھی تھا اور خوددار بھی تھا

گوارا نہ تھی اس کو ضبط محبت

نمود محبت سے انکار بھی تھا

اسے کچھ شکایت تھی اک نازنیں سے

وہ اسلوب دنیا سے بیزار بھی تھا

نوید جنوں جس کی طرز جفا تھی

اسی پیکر ناز سے پیار بھی تھا

مئے لالہ گوں پر تھی جان اس کی صدقہ

وہ دل دادۂ چشم بیمار بھی تھا

جوانی کا اور روپ کا وہ پجاری

عروس حیا کا پرستار بھی تھا

وہ آغوش دولت میں پیدا ہوا تھا

مگر نام دولت سے بیزار بھی تھا

تھی محبوب اسے عشق کی خود ستائی

وہ خاطر ذرا ناز بردار بھی تھا

یہ ہستی تھی اس کے لیے بار خاطر

وہ شاعر تھا دانائے اسرار بھی تھا