ek ittifaqi maut ki rudad

sarāsar ittifāqī maut thī

us ne kahā thā mujh ko jaanā hai

so vo aise gayā jaise zamīñ se ghaas jaatī hai

sarāsar ittifāqan

paañv chalne ke liye hote haiñ

itnā to sabhī taslīm karte haiñ

to aise meñ agar miTTī kī uryānī shikāyat-gar bhī ho jaa.e

to us par aur miTTī Daal dete haiñ

so ham ne Daal dī miTTī-pe-miTTī

ittifāqan

ye to hotā hai

sarāsar ittifāqī hādisa thā

us ne ḳhud likhā thā

duniyā beach aanā ittifāqī amr hai

jaanā sarāsar hādsātī

to us par to adālat ne bhī kuchh hujjat nahīñ kī

us ne ḳhud likhā thā

hujjat nafsiyātī āriza hai

so adālat ne bilā taftīsh use jaane diyā

jaise zamīñ se ghaas jaatī hai

sarāsar ittifāqan

bil-umūm aisā hī hotā hai

hamesha ittifāqan

sarasar ittifaqi maut thi

us ne kaha tha mujh ko jaana hai

so wo aise gaya jaise zamin se ghas jati hai

sarasar ittifaqan

panw chalne ke liye hote hain

itna to sabhi taslim karte hain

to aise mein agar miTTi ki uryani shikayat-gar bhi ho jae

to us par aur miTTi Dal dete hain

so hum ne Dal di miTTi-pe-miTTi

ittifaqan

ye to hota hai

sarasar ittifaqi hadisa tha

us ne KHud likha tha

duniya beach aana ittifaqi amr hai

jaana sarasar hadsati

to us par to adalat ne bhi kuchh hujjat nahin ki

us ne KHud likha tha

hujjat nafsiyati aariza hai

so adalat ne bila taftish use jaane diya

jaise zamin se ghas jati hai

sarasar ittifaqan

bil-umum aisa hi hota hai

hamesha ittifaqan