ایک جان دو جسم

تمہیں خبر ہے

میں چھوٹا تھا تو

تمہارے برتن تمہارے چمچے

تمہاری چھوٹی سی چائے کی پیالی سے کھیلتا تھا

تمہاری گڑیا

تمہارے جھولے میں تم نہ جھولیں

میں جھولتا تھا

تمہیں بھی اپنے کھلونوں سے

ذرا بھی رغبت نہیں رہی تھی

تم اکثر

میرے ہی روبٹوں کے آس پاس ہی

گھومتی تھیں

چھپاؤں ان کو تو

ڈھونڈھتی تھیں

میرے کھلونوں سے مجھ کو ایسی بھی خاص رغبت

نہیں رہی تھی

تمہارے برتن تمہاری پیالی

تمہاری گڑیا

تمہارے ہوتے بھی

آس پاس میرے رہے تھے

میں اب جو سوچوں

تو دل یہ میرا بولتا ہے

کہ دن جمعے کا

یا شب جمعے کی

جمعے کے دن سے رہی ہے نسبت

میں تم سے ملنے نہیں ہوں آیا

تم مجھ سے ملتی نہیں رہی ہو

مگر جو پوچھو

تو سچ یہی ہے

کسی نے دیکھا ہمیں نہیں ہے

مگر میں برتن

تمہارے جھولے

تمہاری گڑیا

تم

روبٹوں کے ہی درمیان

رہ رہی ہو