ek jaisa mukalima

bichhaḌte lamhoñ meñ

us ne mujh se kahā thā dekho

''hamārī rāheñ judā judā haiñ

magar hameñ ek dūsre kā ḳhayāl rakhnā hai zindagī bhar

kisī bhī lamhe udāsiyoñ kī

fasīl haa.il na hone denā

havā ke hāthoñ pe likhte rahnā

judā.iyoñ ke tamām qisse

qadam qadam par jo pesh aa.eñ

vo sānehe bhī nazar meñ rakhnā

maiñ jab bhī lauTā to apne hoñToñ kī tāzgī ko

tumhārī bujhtī huī in āñkhoñ meñ lā rakhūñgā

jo merī apnī haiñ sirf merī''

bichhaḌte lamhoñ meñ us ne mujh se na jaane kyā kuchh kahā sunā thā

aur ab

use bhī yahī kahegā

vo jis ke hāthoñ meñ haath Daale

na.e safar par nikal paḌā hai

bichhaDte lamhon mein

us ne mujh se kaha tha dekho

hamari rahen juda juda hain

magar hamein ek dusre ka KHayal rakhna hai zindagi bhar

kisi bhi lamhe udasiyon ki

fasil hail na hone dena

hawa ke hathon pe likhte rahna

judaiyon ke tamam qisse

qadam qadam par jo pesh aaen

wo sanehe bhi nazar mein rakhna

main jab bhi lauTa to apne honTon ki tazgi ko

tumhaari bujhti hui in aankhon mein la rakhunga

jo meri apni hain sirf meri

bichhaDte lamhon mein us ne mujh se na jaane kya kuchh kaha suna tha

aur ab

use bhi yahi kahega

wo jis ke hathon mein hath Dale

nae safar par nikal paDa hai