ek kahani

mere kamre meñ phailī hai ek kahānī

abhī zarā sī der huī hai

maiñ ne ik maile kāġhaz par

harfoñ ke TukḌe joḌe the

aur kahānī ko thoḌī sī jagah milī thī

phir lafzoñ ke taane baane bikhar ga.e the

jin lafzoñ se āñkh-micholī khelte khelte

biit gayā hai itnā vaqt

ki ab to yaad bhī kab aatā hai

apne jism kī qaid meñ haiñ ham yā bāhar haiñ

itnā vaqt ki manzar saare pighal ga.e haiñ

ojhal haiñ tasvīr ke rañg meñ yā zāhir haiñ

aur kahānī kāġhaz se bah niklī hai

saare kamre meñ phailī hai

sab darvāzoñ aur darīchoñ se lipTī hai

saarī kitābeñ auñdhī kar ke

un se vo sab lafz nikāl ke le aa.ī hai

jo ham ne ik saath paḌhe the

merī almārī se band lifāfe khol ke

saare ḳhvāb uThā laa.ī hai

jo ham ne ik saath bune the

aur zamīñ se chhat tak kaise bechainī se bhaTak rahī hai

thak jaatī hai aur mirī āñkhoñ se bahne lag jaatī hai

bistar ke nīche chhup kar aa.heñ bhartī hai

mere kañdhe par sar rakh ke so jaatī hai

aur kabhī khiḌkī ke paT par māthā Tek ke kho jaatī hai

mere kamre meñ phailī ye ek kahānī

ghaat meñ hai ab

koī rauzan-e-dar darvāza khul jaa.e to

ye is habs-zada kamre se bāhar nikle

jaise mere dil kī ek ik rag ko chiir ke bah niklī thī

mere kamre mein phaili hai ek kahani

abhi zara si der hui hai

main ne ek maile kaghaz par

harfon ke TukDe joDe the

aur kahani ko thoDi si jagah mili thi

phir lafzon ke tane bane bikhar gae the

jin lafzon se aankh-micholi khelte khelte

bit gaya hai itna waqt

ki ab to yaad bhi kab aata hai

apne jism ki qaid mein hain hum ya bahar hain

itna waqt ki manzar sare pighal gae hain

ojhal hain taswir ke rang mein ya zahir hain

aur kahani kaghaz se bah nikli hai

sare kamre mein phaili hai

sab darwazon aur darichon se lipTi hai

sari kitaben aundhi kar ke

un se wo sab lafz nikal ke le aai hai

jo hum ne ek sath paDhe the

meri almari se band lifafe khol ke

sare KHwab uTha lai hai

jo hum ne ek sath bune the

aur zamin se chhat tak kaise bechaini se bhaTak rahi hai

thak jati hai aur meri aankhon se bahne lag jati hai

bistar ke niche chhup kar aahen bharti hai

mere kandhe par sar rakh ke so jati hai

aur kabhi khiDki ke paT par matha Tek ke kho jati hai

mere kamre mein phaili ye ek kahani

ghat mein hai ab

koi rauzan-e-dar darwaza khul jae to

ye is habs-zada kamre se bahar nikle

jaise mere dil ki ek ek rag ko chir ke bah nikli thi