ek kahani ishq ki

maiñ tere bahattar sāthiyoñ meñ nahīñ thā

mujhe to ishq ne muntaḳhab kiyā thā

ek vahshat-nāk bhiiḌ thī mere ird-gird

magar maiñ is bhiiḌ meñ hote hue bhī

kisī vahshat kā hissa na thā

maiñ to tanhā thā

ahl-e-hakam ke nazdīk to ek bāġhī thā

aur vo tamām hujūm jo faqat hujūm thā

be-chehra be-kirdār be-zehn faqat hujūm

jo apnī ġhalat zarūratoñ kī ḳhātir

vahī kahte jo ahl-e-hakam kahte vahī sunte jo unheñ sunāyā jaatā

vahī dekhte jo unheñ dikhā jaatā

sū-e-husain-ibn-e-alī

tum bāġhī Thahre

maiñ is hujūm kā hissa nahīñ thā

magar tum tak aane ke liye mujhe is hujūm se guzarnā thā

tumhāre sach ko jānñe ke liye

maiñ ne kitne hī jhuuT sune

maiñ bātil ke rāstoñ ko ubuur kar ke

haq tak pahuñchā

maiñ tere behtar sāthiyoñ meñ nahīñ thā

magar mashiyyat ko manzūr thā ki husain hur se mile

ki tārīḳh ko bāvar ho

ahl-e-ishq ke faisle

ḳhudā ke faisle hote haiñ

jis ne zamāne kī qasam khā kar

ḳhasāre kā mafhūm samjhāyā

aur maiñ ne jūm-e-ġhalat ke darmiyān

is mafhūm ko pā liyā

maiñ tere bahattar sāthiyoñ meñ nahīñ thā

husain maiñ terā hur thā

main tere bahattar sathiyon mein nahin tha

mujhe to ishq ne muntaKHab kiya tha

ek wahshat-nak bhiD thi mere ird-gird

magar main is bhiD mein hote hue bhi

kisi wahshat ka hissa na tha

main to tanha tha

ahl-e-hakam ke nazdik to ek baghi tha

aur wo tamam hujum jo faqat hujum tha

be-chehra be-kirdar be-zehn faqat hujum

jo apni ghalat zaruraton ki KHatir

wahi kahte jo ahl-e-hakam kahte wahi sunte jo unhen sunaya jata

wahi dekhte jo unhen dikha jata

su-e-husain-ibn-e-ali

tum baghi Thahre

main is hujum ka hissa nahin tha

magar tum tak aane ke liye mujhe is hujum se guzarna tha

tumhaare sach ko jaanne ke liye

main ne kitne hi jhuT sune

main baatil ke raston ko ubur kar ke

haq tak pahuncha

main tere behtar sathiyon mein nahin tha

magar mashiyyat ko manzur tha ki husain hur se mile

ki tariKH ko bawar ho

ahl-e-ishq ke faisle

KHuda ke faisle hote hain

jis ne zamane ki qasam kha kar

KHasare ka mafhum samjhaya

aur main ne jum-e-ghalat ke darmiyan

is mafhum ko pa liya

main tere bahattar sathiyon mein nahin tha

husain main tera hur tha