ek KHat

ek arse se soch rahī huuñ

ki tum ko ḳhat likhūñ

lekin kyā likhūñ

yahī ki añdhere ke bādal chhaT nahīñ rahe haiñ

yā ye likhūñ ki

ḳhauf-o-dahshat ke saa.e

kis tarah kam nahīñ ho rahe haiñ

har taraf chīḳheñ karāheñ lāsheñ dhuāñ

sisaktī javānī bilaktī mamtā

gum-sum bachpan

yā phir bairūt kī kahāniyāñ likhūñ

kashmīr kī sulagtī vādiyoñ kī dāstān likhūñ

bhagal-pur ko mauzūa-e-qalam Thahrā.ūñ

yā srī-lañkā ke fasāne likhūñ

is liye ki

punjab meñ to hādsoñ kā honā vaise hī zarūrī hai

jaise sub.h kā honā

ab maiñ tum ko tab ḳhat likhūñgī

jab har samt se farhat-baḳhsh havā.eñ ā.eñgī

ḳhushī ke paiġhām lā.eñgī

sunahrī dhuup meñ amn kī devī

apnā āñchal lahrā.egī

goliyoñ kī pur-haul āvāzeñ

koyal ke surīle naġhmoñ meñ badal jā.eñgī

logoñ ke zehnoñ se nafratoñ ke bādal chhaT jā.eñge

tab maiñ tum ko ḳhat likhūñgī

ki maiñ bahut ḳhush huuñ

ummīd ki tum bhī ḳhush hoge

ek arse se soch rahi hun

ki tum ko KHat likhun

lekin kya likhun

yahi ki andhere ke baadal chhaT nahin rahe hain

ya ye likhun ki

KHauf-o-dahshat ke sae

kis tarah kam nahin ho rahe hain

har taraf chiKHen karahen lashen dhuan

sisakti jawani bilakti mamta

gum-sum bachpan

ya phir bairut ki kahaniyan likhun

kashmir ki sulagti wadiyon ki dastan likhun

bhagal-pur ko mauzua-e-qalam Thahraun

ya sri-lanka ke fasane likhun

is liye ki

punjab mein to hadson ka hona waise hi zaruri hai

jaise subh ka hona

ab main tum ko tab KHat likhungi

jab har samt se farhat-baKHsh hawaen aaengi

KHushi ke paigham laengi

sunahri dhup mein amn ki dewi

apna aanchal lahraegi

goliyon ki pur-haul aawazen

koyal ke surile naghmon mein badal jaengi

logon ke zehnon se nafraton ke baadal chhaT jaenge

tab main tum ko KHat likhungi

ki main bahut KHush hun

ummid ki tum bhi KHush hoge