ek KHwab ki duri par

ik ḳhvāhish thī

kabhī aisā ho

kabhī aisā ho ki añdhere meñ

(jab dil vahshat kartā ho bahut

jab ġham shiddat kartā ho bahut)

koī tiir chale

koī tiir chale jo tarāzū ho mire siine meñ

ik ḳhvāhish thī

kabhī aisā ho

kabhī aisā ho ki añdhere meñ

(jab nīndeñ kam hotī hoñ bahut

jab āñkheñ nam hotī hoñ bahut)

sar-e-ā.īna koī sham.a jale

koī sham.a jale aur bujh jaa.e magar aks rahe ā.īne meñ

ik ḳhvāhish thī

vo ḳhvāhish puurī ho bhī chukī

dil jaise derīna dushman kī sāzish puurī ho bhī chukī

aur ab yuuñ hai

jiine aur jiite rahne ke biich ek ḳhvāb kī

duurī hai

vo duurī ḳhatm nahīñ hotī

aur ye duurī sab ḳhvāb dekhne vāloñ kī majbūrī hai

majbūrī ḳhatm nahīñ hotī

ek KHwahish thi

kabhi aisa ho

kabhi aisa ho ki andhere mein

(jab dil wahshat karta ho bahut

jab gham shiddat karta ho bahut)

koi tir chale

koi tir chale jo taraazu ho mere sine mein

ek KHwahish thi

kabhi aisa ho

kabhi aisa ho ki andhere mein

(jab ninden kam hoti hon bahut

jab aankhen nam hoti hon bahut)

sar-e-aina koi shama jale

koi shama jale aur bujh jae magar aks rahe aaine mein

ek KHwahish thi

wo KHwahish puri ho bhi chuki

dil jaise derina dushman ki sazish puri ho bhi chuki

aur ab yun hai

jine aur jite rahne ke bich ek KHwab ki

duri hai

wo duri KHatm nahin hoti

aur ye duri sab KHwab dekhne walon ki majburi hai

majburi KHatm nahin hoti