ek laDki ki maut

is se qabl

maut tumheñ ek qatra banā de

dūsroñ kī palkoñ par

aTak sakne kī quvvat se labrez

agar tum paḌhnā chāho in shabdoñ ko

jo havā par rakhe jaate haiñ

ki un kī ḳhushbū

qaid kī zillat se rū-shanās na ho

in meñ ishāra hai

kohsāroñ par buland hone kā

jab chhoTe chhoTe patthar

luḌhkāne kī koshish karte haiñ nīche

aur tum

un ke saroñ ko kuchal kar

apnī sāñsoñ meñ buland hotī ho

maidānoñ kā ishāra

jahāñ kuchh der qabl ghar ābād the

ab vahāñ taaza havā

rukī huī siskiyāñ bahā le ga.ī hai

purāne log

is liye na.e-pan se ghabrāte haiñ

jaldī badalte vaqt kā nazāra

yahāñ se behtar kahāñ hogā

tum na.e-pan se ḳhauf-zada hue baġhair

na.ī soch kā hathiyār

panje meñ jakḌe

us kī āñkhoñ par sho.ale barsā denā

tumhāre phephaḌoñ meñ aTaktī sāñseñ

nā-umīdiyoñ ko māyūs kar ke

zindagī kī suhūlat talāsh kareñ

to unheñ paḌhnā

agar chāho to

shabd apnā rang badalte rahte haiñ

is se qabl

maut tumhein ek qatra bana de

dusron ki palkon par

aTak sakne ki quwwat se labrez

agar tum paDhna chaho in shabdon ko

jo hawa par rakhe jate hain

ki un ki KHushbu

qaid ki zillat se ru-shanas na ho

in mein ishaara hai

kohsaron par buland hone ka

jab chhoTe chhoTe patthar

luDhkane ki koshish karte hain niche

aur tum

un ke saron ko kuchal kar

apni sanson mein buland hoti ho

maidanon ka ishaara

jahan kuchh der qabl ghar aabaad the

ab wahan taza hawa

ruki hui siskiyan baha le gai hai

purane log

is liye nae-pan se ghabraate hain

jaldi badalte waqt ka nazara

yahan se behtar kahan hoga

tum nae-pan se KHauf-zada hue baghair

nai soch ka hathiyar

panje mein jakDe

us ki aankhon par shoale barsa dena

tumhaare phephaDon mein aTakti sansen

na-umidiyon ko mayus kar ke

zindagi ki suhulat talash karen

to unhen paDhna

agar chaho to

shabd apna rang badalte rahte hain