ek lamha

aaj is shab ke sannāTe meñ niiñd ne āñkheñ pherī haiñ

shahr thakā-hārā ḳhāmoshī kī bāhoñ meñ sotā hai

yahāñ vahāñ ḳhvāboñ ke qatre shabnam ban kar girte haiñ

kabhī kabhī kuttoñ kī āvāzeñ galiyoñ se uThtī haiñ

saḌkoñ par din kī raunaq ke bhuut pareshāñ phirte haiñ

zaḳhmoñ kī mānind hasīñ jismoñ pe baraste haiñ sikke

shīshoñ ke pīchhe afsurda sham.eñ ashk bahātī haiñ

dast-e-talab choroñ ko tārīkī meñ raah dikhātā hai

lamhoñ ke sāhil par shorish-e-hastī lahreñ gintī hai

jaane kitnī ummīdeñ is raat ke dil meñ rotī haiñ

aur mirī nazroñ ke aage

imkānāt ke bhīge bhīge sāyoñ meñ jugnū kī tarah

fikr-o-taḳhayyul kā ik lamha dhīre dhīre ubhrā hai

kitne ehsāsāt taḌap uTThe haiñ raat ke siine meñ

haa.e us lamhe kī āñkheñ kaash maiñ un meñ utar pā.ūñ

aaj is shab ke sannaTe mein nind ne aankhen pheri hain

shahr thaka-haara KHamoshi ki bahon mein sota hai

yahan wahan KHwabon ke qatre shabnam ban kar girte hain

kabhi kabhi kutton ki aawazen galiyon se uThti hain

saDkon par din ki raunaq ke bhut pareshan phirte hain

zaKHmon ki manind hasin jismon pe baraste hain sikke

shishon ke pichhe afsurda shamen ashk bahati hain

dast-e-talab choron ko tariki mein rah dikhata hai

lamhon ke sahil par shorish-e-hasti lahren ginti hai

jaane kitni ummiden is raat ke dil mein roti hain

aur meri nazron ke aage

imkanat ke bhige bhige sayon mein jugnu ki tarah

fikr-o-taKHayyul ka ek lamha dhire dhire ubhra hai

kitne ehsasat taDap uTThe hain raat ke sine mein

hae us lamhe ki aankhen kash main un mein utar paun