ek manzar aasman jaisa

maiñ vaqt ke ḳheme se niklā...

to uljhanoñ kī chilchilātī dhuup meñ

ziist mujh se lipaT paḌī

aur suljhanoñ kā safar mere talvoñ par likh diyā

inkār se nā-āshnā

maiñ ne paañv par safar bāñdh liyā

ab āsmān jaisā ek hasīñ manzar banā kar

mujhe safed parindoñ ke havāle karnā hai

dil kī zamīn se nafrat kī jaḌeñ kaaT kar

vafā-parvar jazbe kāsht kar ke

dhaḌkanoñ ko ik na.ī tartīb meñ Dhālnā hai

be-rahm sā.atoñ ko

mehrbān lamhoñ kī dāstān sunānī hai

añdheroñ ko raushnī ke ġhilāf meñ band karnā hai

an-ginat tārīk ā.ankhoñ meñ

dhanak rañgoñ se zindagī kī tasvīr banānī hai

tāsīr ko apne lahje meñ panāh de kar

āsmān tak duāoñ kā rāsta khojnā hai

harf-āshnā.ī se apnā muqaddar āsmānoñ par likh kar

band muTThī meñ chiñghāḌte sukūt aur andar bharī chīḳh ko

gum-nāmī ke jazīroñ meñ dafn karnā hai

āsmāñ jaise is hasīn manzar ko taḳhlīq kar ke

zamīn ko āsmān banānā hai

main waqt ke KHeme se nikla

to uljhanon ki chilchilati dhup mein

zist mujh se lipaT paDi

aur suljhanon ka safar mere talwon par likh diya

inkar se na-ashna

main ne panw par safar bandh liya

ab aasman jaisa ek hasin manzar bana kar

mujhe safed parindon ke hawale karna hai

dil ki zamin se nafrat ki jaDen kaT kar

wafa-parwar jazbe kasht kar ke

dhaDkanon ko ek nai tartib mein Dhaalna hai

be-rahm saaton ko

mehrban lamhon ki dastan sunani hai

andheron ko raushni ke ghilaf mein band karna hai

an-ginat tarik aaankhon mein

dhanak rangon se zindagi ki taswir banani hai

tasir ko apne lahje mein panah de kar

aasman tak duaon ka rasta khojna hai

harf-ashnai se apna muqaddar aasmanon par likh kar

band muTThi mein chinghaDte sukut aur andar bhari chiKH ko

gum-nami ke jaziron mein dafn karna hai

aasman jaise is hasin manzar ko taKHliq kar ke

zamin ko aasman banana hai