ek manzar

ser-eleven ke smugglers

hīroñ kī smuggling par bāteñ kar rahe haiñ

shumālī bulgaria ke ilāqoñ se

umda qism kā tambākū aane vaalā hai

light-tower kī sīḌhiyoñ ke nīche

jeans kī nekar meñ kokīn kī thailiyāñ chhupā kar

maiDonā vāpas jā chukī hai

būḌhā lenos baiThā hai

fog light kī piilī raushnī meñ

lamha dāḌhī khuja rahā hai

sāhil kī hathelī par

ret kī uñgliyoñ meñ lipTī

barahna sāñsoñ kī uljhan par

raat kā ḳhuun saraktā hai

niDhāl jismoñ kī rūmāniyat meñ

lams kā sīlan-zada shor girtā hai

samundar barf kī jhiil meñ

tabdīl ho saktā hai

cigarette jalāne kā aalā

giilā paḌ gayā hai

bithos

lighter milegā

oh shukriya

ser-elewen ke smugglers

hiron ki smuggling par baaten kar rahe hain

shumali bulgaria ke ilaqon se

umda qism ka tambaku aane wala hai

light-tower ki siDhiyon ke niche

jeans ki nekar mein kokin ki thailiyan chhupa kar

maiDona wapas ja chuki hai

buDha lenos baiTha hai

fog light ki pili raushni mein

lamha daDhi khuja raha hai

sahil ki hatheli par

ret ki ungliyon mein lipTi

barahna sanson ki uljhan par

raat ka KHun sarakta hai

niDhaal jismon ki rumaniyat mein

lams ka silan-zada shor girta hai

samundar barf ki jhil mein

tabdil ho sakta hai

cigarette jalane ka aala

gila paD gaya hai

bithos

lighter milega

oh shukriya