ek mashhur intiha-pasand nai nasl ke nam

abhī se kyoñ tumhāre jism kā Dhāñcha

batāo reza reza hai

na jaane kyoñ fasurda ho abhī se tum

na jaane buzdilī kā taaj kyoñ sar par tumhāre hai

zarā socho

ki tum is daur kā katba bane ho kyoñ

abhī se zard chehra ho gayā hai kyoñ

abhī to ziist ke lākhoñ marāhil se guzarnā hai

abhī se pastī-o-zillat ke be-ma.anī azāboñ ko

kaho jheloge tum kab tak

abhī se tishna-lab ho kar

sarāboñ kī taraf kyoñ aa rahe ho tum

kahāñ chhoḌ aa.e ho apne samundar ko

tumheñ yuuñ hī bhaTaknā hai

to phir

ik mashvara detā huuñ maiñ tum ko

agar tum ibn-e-ādam ho

to chhup jaao kisī andhī guphā meñ tum

bahut mumkin hai

tum ko zaat kā irfān hāsil ho

abhi se kyon tumhaare jism ka Dhancha

batao reza reza hai

na jaane kyon fasurda ho abhi se tum

na jaane buzdili ka taj kyon sar par tumhaare hai

zara socho

ki tum is daur ka katba bane ho kyon

abhi se zard chehra ho gaya hai kyon

abhi to zist ke lakhon marahil se guzarna hai

abhi se pasti-o-zillat ke be-mani azabon ko

kaho jheloge tum kab tak

abhi se tishna-lab ho kar

sarabon ki taraf kyon aa rahe ho tum

kahan chhoD aae ho apne samundar ko

tumhein yun hi bhaTakna hai

to phir

ek mashwara deta hun main tum ko

agar tum ibn-e-adam ho

to chhup jao kisi andhi gupha mein tum

bahut mumkin hai

tum ko zat ka irfan hasil ho