ek mohre ka safar

jab vo kam-umr hī thā

us ne ye jaan liyā thā ki agar jiinā hai

baḌī chālākī se jiinā hogā

aañkh kī āḳhirī had tak hai bisāt-e-hastī

aur vo māmūlī sā ik mohra hai

ek ik ḳhāna bahut soch ke chalnā hogā

baazī āsān nahīñ thī us kī

duur tak chāroñ taraf phaile the

mohre

jallād

nihāyat hī saffāk

saḳht be-rahm

bahut hī chālāk

apne qabze meñ liye

puurī bisāt

us ke hisse meñ faqat maat liye

vo jidhar jaatā

use miltā thā

har nayā ḳhāna na.ī ghaat liye

vo magar bachtā rahā

chaltā rahā

ek ghar

dūsrā ghar

tīsrā ghar

paas aayā kabhī auroñ ke

kabhī duur huā

vo magar bachtā rahā

chaltā rahā

go ki māmūlī sā mohara thā magar jiit gayā

yuuñ vo ik roz baḌā mohara banā

ab vo mahfūz hai ik ḳhāne meñ

itnā mahfūz hai ik ḳhāne meñ

itnā mahfūz ki dushman to alag

dost bhī paas nahīñ aa sakte

us ke ik haath meñ hai jiit us kī

dūsre haath meñ tanhā.ī hai

jab wo kam-umr hi tha

us ne ye jaan liya tha ki agar jina hai

baDi chaalaki se jina hoga

aankh ki aaKHiri had tak hai bisat-e-hasti

aur wo mamuli sa ek mohra hai

ek ek KHana bahut soch ke chalna hoga

bazi aasan nahin thi us ki

dur tak chaaron taraf phaile the

mohre

jallad

nihayat hi saffak

saKHt be-rahm

bahut hi chaalak

apne qabze mein liye

puri bisat

us ke hisse mein faqat mat liye

wo jidhar jata

use milta tha

har naya KHana nai ghat liye

wo magar bachta raha

chalta raha

ek ghar

dusra ghar

tisra ghar

pas aaya kabhi auron ke

kabhi dur hua

wo magar bachta raha

chalta raha

go ki mamuli sa mohara tha magar jit gaya

yun wo ek roz baDa mohara bana

ab wo mahfuz hai ek KHane mein

itna mahfuz hai ek KHane mein

itna mahfuz ki dushman to alag

dost bhi pas nahin aa sakte

us ke ek hath mein hai jit us ki

dusre hath mein tanhai hai