ek nazm

abhī ġhair-dilchasp ho jā.eñge ham

abhī tum kahoge

ki be-kār hai guftugū kā bahāna

abhī maiñ kahūñgā

ki be-kār hai kārobār-e-zamāna

abhī tum zabāñ par

sulagtī huī ret kā zā.iqa chand lamhoñ meñ mahsūs karne lagoge

abhī maiñ zabāñ par

koī ḳhūbsūrat farishta-sifat naam tanhā.iyoñ meñ nahīñ lā sakūñgā

abhī zehn bīmār ho jā.eñge sab

falak tak pahuñchte hue haath be-kār ho jā.eñge sab

bhale yā bure ham abhī haiñ salāmat

abhī TūTne ko hai lekin qayāmat

agar marg-e-ehsās kī aarzū āḳhirī qadr Thahrī

abhī ek be-jān maazī ke sahrā meñ kho jā.eñge ham

abhī ġhair-dilchasp ho jā.eñge ham

abhi ghair-dilchasp ho jaenge hum

abhi tum kahoge

ki be-kar hai guftugu ka bahana

abhi main kahunga

ki be-kar hai karobar-e-zamana

abhi tum zaban par

sulagti hui ret ka zaiqa chand lamhon mein mahsus karne lagoge

abhi main zaban par

koi KHubsurat farishta-sifat nam tanhaiyon mein nahin la sakunga

abhi zehn bimar ho jaenge sab

falak tak pahunchte hue hath be-kar ho jaenge sab

bhale ya bure hum abhi hain salamat

abhi TuTne ko hai lekin qayamat

agar marg-e-ehsas ki aarzu aaKHiri qadr Thahri

abhi ek be-jaan mazi ke sahra mein kho jaenge hum

abhi ghair-dilchasp ho jaenge hum