ek nazm

ai kisī gulshan zarrīñ kī garāñ-qadr kalī

apnī ujḌī huī mahkār chhupā le mujh se

ai kisī bistar-e-kam-ḳhvāb kī be-rañg shikan

apnā rauñdā huā kirdār chhupā le mujh se

ai kisī jannat-e-zar-fām se aane vaalī

apnā TuuTā huā pindār chhupā le mujh se

tū ne ik baar kahā thā mujhe tanhā.ī meñ

pyaar daulat kā parastār nahīñ ho saktā

zindagī hirs ke pahlū meñ nahīñ so saktī

jism rusvā sar-e-bāzār nahīñ ho saktā

valvale ruuh ke nīlām nahīñ ho sakte

husn zillat kā parastār nahīñ ho saktā

maslahat aaj magar jiit chukī hai tujh ko

koī kis muñh se kahe mūnis-o-ġham-ḳhvār tujhe

koī kis dil se kahe pyaar kī raanī tujh ko

koī kis tarah kahe paikar-e-īsār tujhe

tū ne bechī hai sar-e-ām javānī apnī

gudgudātī hai zar-o-sīm kī jhankār tujhe

ye tirā pyaar tire jism kā saudā hī sahī

ab tirī ruuh tire paas nahīñ aa.egī

ye tirā dil ki bhaTaktā hī chalā jaatā hai

is meñ ab shiddat-e-ehsās nahīñ aa.egī

tū ne har-chand garāñ nirḳh ye jalve beche

ye tijārat bhī tujhe raas nahīñ aa.egī

dekh us daur-e-jahāñ-soz ke vīrāne meñ

lazzat-e-jism ke tūfān ba-har-gām uThe

kyā yahī tujh ko sikhāyā hai nizām-e-zar ne

ki mohabbat kā janāza sahar-o-shām uThe

kyā yūñhī pyaar kī tauqīr huā kartī hai

ki mahaktī huī har saañs kā nīlām uThe

dekh is dahr meñ arbāb-e-havas ke hāthoñ

aabrū pyaar kī miTTī meñ milī jaatī hai

hirs kā shor fazāoñ meñ rachā jaatā hai

baat iḳhlās kī hoñToñ meñ silī jaatī hai

sādgī husn kā majrūh-e-tabassum ban kar

kisī jallād ke chehre pe khulī jaatī hai

tū ki ab tujh se mujhe koī sarokār nahīñ

ban ke tū kis ke liye ā.ina-rū aatī hai

ye numā.ish kī mohabbat ise maiñ jāntā huuñ

kyuuñ mire sāmne sahmī huī tū aatī hai

ai kisi gulshan zarrin ki garan-qadr kali

apni ujDi hui mahkar chhupa le mujh se

ai kisi bistar-e-kam-KHwab ki be-rang shikan

apna raunda hua kirdar chhupa le mujh se

ai kisi jannat-e-zar-fam se aane wali

apna TuTa hua pindar chhupa le mujh se

tu ne ek bar kaha tha mujhe tanhai mein

pyar daulat ka parastar nahin ho sakta

zindagi hirs ke pahlu mein nahin so sakti

jism ruswa sar-e-bazar nahin ho sakta

walwale ruh ke nilam nahin ho sakte

husn zillat ka parastar nahin ho sakta

maslahat aaj magar jit chuki hai tujh ko

koi kis munh se kahe munis-o-gham-KHwar tujhe

koi kis dil se kahe pyar ki rani tujh ko

koi kis tarah kahe paikar-e-isar tujhe

tu ne bechi hai sar-e-am jawani apni

gudgudati hai zar-o-sim ki jhankar tujhe

ye tera pyar tere jism ka sauda hi sahi

ab teri ruh tere pas nahin aaegi

ye tera dil ki bhaTakta hi chala jata hai

is mein ab shiddat-e-ehsas nahin aaegi

tu ne har-chand garan nirKH ye jalwe beche

ye tijarat bhi tujhe ras nahin aaegi

dekh us daur-e-jahan-soz ke virane mein

lazzat-e-jism ke tufan ba-har-gam uThe

kya yahi tujh ko sikhaya hai nizam-e-zar ne

ki mohabbat ka janaza sahar-o-sham uThe

kya yunhi pyar ki tauqir hua karti hai

ki mahakti hui har sans ka nilam uThe

dekh is dahr mein arbab-e-hawas ke hathon

aabru pyar ki miTTi mein mili jati hai

hirs ka shor fazaon mein racha jata hai

baat iKHlas ki honTon mein sili jati hai

sadgi husn ka majruh-e-tabassum ban kar

kisi jallad ke chehre pe khuli jati hai

tu ki ab tujh se mujhe koi sarokar nahin

ban ke tu kis ke liye aaina-ru aati hai

ye numaish ki mohabbat ise main jaanta hun

kyun mere samne sahmi hui tu aati hai