ek nazm

kis tasavvur ke raqs meñ go

tirī sadā kā vajūd mujh ko milā nahīñ hai

kisī kitāb-e-kuhan meñ chaltī aziim dānish ke naqsh-e-pā meñ

tire badan kā nishān mujh ko milā nahīñ hai

maiñ chaar samtoñ se pūchhtā huuñ

anāsiroñ ke taġhayyuroñ se

meñ saltanat ke najūmiyoñ se

ye pūchhtā huuñ

ki kaun hai tū

jo mere ḳhvāboñ ke silsile meñ

mire tafakkur ke rāstoñ meñ

na.e tanāzoñ kā biij bo kar chalī ga.ī hai

kahāñ ki mujh ko patā nahīñ hai

zamīñ ke naqshe pe ābnāo ke saath chal kar

kabhī sadā se bhī tez chalte jahāz ke dā.ere darīche se sar lagā kar

meñ arġhavānī sharāb thāme

dabīz shīshoñ kī dūrbīñ se

nigāh kī āḳhirī hadoñ tak tire tasavvur ko dekhtā thā

magar ḳhalā ke sivā kahīñ kuchh nazar na aayā

ye sochtā huuñ ki maiñ tasavvur ke ā.īne meñ

salīs bātoñ ke pairahan meñ

tujhe utārūñ to kis tarah maiñ

jo zindagī ke tazād meñ hai

jo aarzū ke fasād meñ hai

jo terī ḳhātir tamām duniyā kī ishratoñ se farār ho kar

na.e tamaddun ke zā.iche meñ

na.ī alāmat ke dā.ere meñ tire qadam ke nuzūl ko phir

talāsh karne kī kashmakash se guzar rahā hai

charāġh jis ke dimāġh kā

ik murāqabat meñ sulag rahā hai

kis tasawwur ke raqs mein go

teri sada ka wajud mujh ko mila nahin hai

kisi kitab-e-kuhan mein chalti azim danish ke naqsh-e-pa mein

tere badan ka nishan mujh ko mila nahin hai

main chaar samton se puchhta hun

anasiron ke taghayyuron se

mein saltanat ke najumiyon se

ye puchhta hun

ki kaun hai tu

jo mere KHwabon ke silsile mein

mere tafakkur ke raston mein

nae tanazon ka bij bo kar chali gai hai

kahan ki mujh ko pata nahin hai

zamin ke naqshe pe aabnao ke sath chal kar

kabhi sada se bhi tez chalte jahaz ke daere dariche se sar laga kar

mein arghawani sharab thame

dabiz shishon ki durbin se

nigah ki aaKHiri hadon tak tere tasawwur ko dekhta tha

magar KHala ke siwa kahin kuchh nazar na aaya

ye sochta hun ki main tasawwur ke aaine mein

salis baaton ke pairahan mein

tujhe utarun to kis tarah main

jo zindagi ke tazad mein hai

jo aarzu ke fasad mein hai

jo teri KHatir tamam duniya ki ishraton se farar ho kar

nae tamaddun ke zaiche mein

nai alamat ke daere mein tere qadam ke nuzul ko phir

talash karne ki kashmakash se guzar raha hai

charagh jis ke dimagh ka

ek muraqabat mein sulag raha hai