ek nazm kahin se bhi shurua ho sakti hai

ek nazm kahīñ se bhī shurūa ho saktī hai

jūtoñ kī joḌī se

yā qabr se jo bārish meñ baiTh ga.ī

yā us phuul se jo qabr kī pā.īnī par khilā

har ek ko kahīñ na kahīñ panāh mil ga.ī

chīñtiyoñ ko jā-e-namāz ke nīche

aur laḌkiyoñ ko mirī āvāz meñ

murda bail kī khopaḌī meñ gilahrī ne ghar banā liyā hai

nazm kā bhī ek ghar hogā

kisī jilā-vatan kā dil yā intizār kartī huī āñkheñ

ek pahiya hai jo banāne vaale se adhūrā rah gayā hai

ise ek nazm mukammal kar saktī hai

ek gūñjtā huā āsmān nazm ke liye kaafī hotā hai

lekin ye ek nāshta-dān meñ bā-āsānī samā saktī hai

phuul aañsū aur ghanTiyāñ is meñ piroī jā saktī haiñ

ise andhere meñ gaayā jā saktā hai

tyauhāroñ kī dhuup meñ sukhāyā jā saktā hai

tum ise dekh saktī ho

ḳhālī bartanoñ ḳhālī qabzoñ aur ḳhālī gahvāroñ meñ

tum ise sun saktī ho

hāth-gāḌiyoñ aur janāzoñ ke saath chalte hue

tum ise chuum saktī ho

bandar-gāhoñ kī bhiiḌ meñ

tum ise gūñdh saktī ho

patthar kī maañd meñ

tum ise ugā saktī ho

podīne kī kiyāriyoñ meñ

ek nazm

kisī bhī raat se tārīk nahīñ kī jā saktī

kisī talvār se kaaTī nahīñ jā saktī

kisī dīvār meñ qaid nahīñ kī jā saktī

ek nazm

kahīñ bhī saath chhoḌ saktī hai

bādal kī tarah

havā kī tarah

rāste kī tarah

baap ke haath kī tarah

ek nazm kahin se bhi shurua ho sakti hai

juton ki joDi se

ya qabr se jo barish mein baiTh gai

ya us phul se jo qabr ki paini par khila

har ek ko kahin na kahin panah mil gai

chintiyon ko ja-e-namaz ke niche

aur laDkiyon ko meri aawaz mein

murda bail ki khopaDi mein gilahri ne ghar bana liya hai

nazm ka bhi ek ghar hoga

kisi jila-watan ka dil ya intizar karti hui aankhen

ek pahiya hai jo banane wale se adhura rah gaya hai

ise ek nazm mukammal kar sakti hai

ek gunjta hua aasman nazm ke liye kafi hota hai

lekin ye ek nashta-dan mein ba-asani sama sakti hai

phul aansu aur ghanTiyan is mein piroi ja sakti hain

ise andhere mein gaya ja sakta hai

tyauhaaron ki dhup mein sukhaya ja sakta hai

tum ise dekh sakti ho

KHali bartanon KHali qabzon aur KHali gahwaron mein

tum ise sun sakti ho

hath-gaDiyon aur janazon ke sath chalte hue

tum ise chum sakti ho

bandar-gahon ki bhiD mein

tum ise gundh sakti ho

patthar ki mand mein

tum ise uga sakti ho

podine ki kiyariyon mein

ek nazm

kisi bhi raat se tarik nahin ki ja sakti

kisi talwar se kaTi nahin ja sakti

kisi diwar mein qaid nahin ki ja sakti

ek nazm

kahin bhi sath chhoD sakti hai

baadal ki tarah

hawa ki tarah

raste ki tarah

bap ke hath ki tarah