ek nazm

use ham zā.icha kahte the tum tasvīr kahte the

tumhāre un dinoñ kī jab tumhāre dil meñ niilā āsmāñ hogā

tumhāre sāmne hoñgī

sunahrī vādiyāñ ashjār kī rangīñ qatāreñ titliyāñ pariyāñ

kahīñ ḳhvāboñ kī sarhad par tumhārā āshiyāñ hogā

ye mumkin hai tumhāre dam-qadam se jāvedāñ hogā

tumheñ tasvīr pyārī thī

tum us tasvīr kī takmīl meñ masrūf the barsoñ

agar tum chāhte to kal se pahle āsmāñ dil meñ utar aatā vahīñ rahtā

sunahrī vādiyāñ ashjār kī rangīñ qatāreñ titliyāñ pariyāñ

usī gulshan kī ho jātīñ usī āñgan meñ bas jātīñ

jise tum ne banāyā thā

magar tasvīr meñ tum ne

jise ḳhvāboñ kī sarhad par na jaane kyoñ dikhāyā thā

tumhāre dil meñ sannāTā

tumhārā āsmāñ tiira

tumhārī vādiyoñ meñ gūñjtī haiñ barf kī chīḳheñ

kahāñ ashjār kaisī titliyāñ kis des kī pariyāñ

yahāñ tum kaun ho socho

tumhāre zaḳhm hoñge mundamil to maut se hoñge

use hum zaicha kahte the tum taswir kahte the

tumhaare un dinon ki jab tumhaare dil mein nila aasman hoga

tumhaare samne hongi

sunahri wadiyan ashjar ki rangin qataren titliyan pariyan

kahin KHwabon ki sarhad par tumhaara aashiyan hoga

ye mumkin hai tumhaare dam-qadam se jawedan hoga

tumhein taswir pyari thi

tum us taswir ki takmil mein masruf the barson

agar tum chahte to kal se pahle aasman dil mein utar aata wahin rahta

sunahri wadiyan ashjar ki rangin qataren titliyan pariyan

usi gulshan ki ho jatin usi aangan mein bas jatin

jise tum ne banaya tha

magar taswir mein tum ne

jise KHwabon ki sarhad par na jaane kyon dikhaya tha

tumhaare dil mein sannaTa

tumhaara aasman tera

tumhaari wadiyon mein gunjti hain barf ki chiKHen

kahan ashjar kaisi titliyan kis des ki pariyan

yahan tum kaun ho socho

tumhaare zaKHm honge mundamil to maut se honge