ek niDhaal nazm

tāliyoñ kī guuñj

zaa.il ho chukī

haal ḳhālī ho chukā

daad ke bakse ulaT kar chal diye

log merī chīḳhtī nazmoñ kī

bolī de chuke

maiñ jam.a tafrīq kī mad meñ

binā tartīb sāñsoñ kī

ghuTan se chuur huuñ

kaash dhartī āsmāñ kī

vus.atoñ ko jāntī

ḳhvāb meñ pinhāñ

haqīqat ko haqīqat māntī

haañ magar

in dāstānoñ kā sikandar kaun hai

kaun hai

uftādgī kī sā.atoñ kā ham-navā

kaun hai

tafhīm kī tishna-labī kā rāzdāñ

kaun hai

koī nahīñ

vo jo aa.e the

vo aa kar jā chuke

taliyon ki gunj

zail ho chuki

haal KHali ho chuka

dad ke bakse ulaT kar chal diye

log meri chiKHti nazmon ki

boli de chuke

main jama tafriq ki mad mein

bina tartib sanson ki

ghuTan se chur hun

kash dharti aasman ki

wusaton ko jaanti

KHwab mein pinhan

haqiqat ko haqiqat manti

han magar

in dastanon ka sikandar kaun hai

kaun hai

uftadgi ki saaton ka ham-nawa

kaun hai

tafhim ki tishna-labi ka raazdan

kaun hai

koi nahin

wo jo aae the

wo aa kar ja chuke