ek pur-asrar sada

us ke hañsne aur rone kī sadā

ho ga.ī thī

kuchh dinoñ se ek sī

ab vo aksar din meñ sotā

aur shab-bhar jāgtā

ghūmtā thā shahr kī saḌkoñ pe tanhā sub.h tak

ik sadā

suunī fazāoñ meñ lagātā

guuñj suntā

phir lagātā

chaltā jaatā

be-takāñ

log ab sote the rātoñ ko na shāyad jāgte

ik ajab aalam thā

sunte the jūñhī āvāz us kī duur se

vo jo masrūf-e-fuġhāñ the sochte

hai koī bad-baḳht un jaisā

kisī TeḌhe safar meñ

be-amāñ

aur jo sarshār the mauj-e-ziyā kī raah meñ

vo bhī zarf-e-sar-ḳhushī kī daad dete the use

ek sannāTā hai ab har rah-guzar par chār-sū

jāñ-ba-haq, kuchh roz guzre

ho gayā vo shaḳhs

ye afvāh hai

kyā ajab aafat makīnoñ ke saroñ par aa paḌī

apne ġham kī aur ḳhushī kī

is sadā ke faiz se

mil ga.ī thī un ko ik pahchān sī

kyā huā ye hādsa kaise huā

vo bhī āḳhir kho ga.ī

us ke hansne aur rone ki sada

ho gai thi

kuchh dinon se ek si

ab wo aksar din mein sota

aur shab-bhar jagta

ghumta tha shahr ki saDkon pe tanha subh tak

ek sada

suni fazaon mein lagata

gunj sunta

phir lagata

chalta jata

be-takan

log ab sote the raaton ko na shayad jagte

ek ajab aalam tha

sunte the junhi aawaz us ki dur se

wo jo masruf-e-fughan the sochte

hai koi bad-baKHt un jaisa

kisi TeDhe safar mein

be-aman

aur jo sarshaar the mauj-e-ziya ki rah mein

wo bhi zarf-e-sar-KHushi ki dad dete the use

ek sannaTa hai ab har rah-guzar par chaar-su

jaan-ba-haq, kuchh roz guzre

ho gaya wo shaKHs

ye afwah hai

kya ajab aafat makinon ke saron par aa paDi

apne gham ki aur KHushi ki

is sada ke faiz se

mil gai thi un ko ek pahchan si

kya hua ye hadsa kaise hua

wo bhi aaKHir kho gai