ek purana shahr

mohr-ba-lab vīrān darīche darvāze sunsān

duur pahāḌoñ kī choTī par shāhī goristān

niim kī shāḳhoñ meñ uljhī hai kankavve kī kaañp

dīvāroñ par reñg rahā hai shikastagī kā saañp

saḌkeñ rah-gīroñ par Dāleñ ThanDī sard nigāh

sharm-e-uryānī se chup hai būḌhī shahr-panāh

vaqt ke qadmoñ kī aahaT detī hai sunā.ī aise

sannāTe meñ bhaTak rahī hoñ biitī sadiyāñ jaise

ik ik lamha DhūñD rahā hai khoī huī rānā.ī

dauḌ rahā hai pīchhe ko ba-vasf-e-shikasta-pā.ī

raah meñ lekin kuchh dīvāreñ aan khaḌī huī haiñ

dīvāreñ jin par nañgī sañgīneñ gaḌī huī haiñ

un se sar Takrāte lamhoñ ke ye pagle saa.e

mamlikat-e-fardā kā rasta kaun unheñ dikhlā.e

mohr-ba-lab viran dariche darwaze sunsan

dur pahaDon ki choTi par shahi goristan

nim ki shaKHon mein uljhi hai kankawwe ki kanp

diwaron par reng raha hai shikastagi ka sanp

saDken rah-giron par Dalen ThanDi sard nigah

sharm-e-uryani se chup hai buDhi shahr-panah

waqt ke qadmon ki aahaT deti hai sunai aise

sannaTe mein bhaTak rahi hon biti sadiyan jaise

ek ek lamha DhunD raha hai khoi hui ranai

dauD raha hai pichhe ko ba-wasf-e-shikasta-pai

rah mein lekin kuchh diwaren aan khaDi hui hain

diwaren jin par nangi sanginen gaDi hui hain

un se sar Takraate lamhon ke ye pagle sae

mamlikat-e-farda ka rasta kaun unhen dikhlae