ek qalandar ke nam

bahā.e ilm ke dariyā

sarāboñ ko haqīqat dī

gumāñ kī raat ne paa.ī

yaqīñ kī raushnī tum se

tumhārī fikr ne bāñg-e-darā ban kar

jagāyā so.e hue zehnoñ ko

rahe koshāñ

ki ho ta.alīm-e-nisvāñ aam millat meñ

har firqe meñ ghar āñgan meñ āñchal meñ

simaT aa.e na.ī tahzīb

jin meñ parvarish paa.e hue phūloñ kī

ḳhushbū ko zamāne ke muqābil faḳhr se rakh kar

kareñ hindostāñ kā naam ūñchā

ye maqsad thā tumhārī zindagī kā

tumhīñ ne haath rakkhā nabz-e-daurāñ par

bane tiryāk is zahr-e-halāhil kā

jahālat kī rag-o-pai meñ jo gardish kar rahā thā

rakhā ta.alīm ke dast-e-hinā.ī par charāġhoñ ko

banāyā āñchaloñ se parcham-e-fat.h-o-zafar tum ne

luTā.e maḳhzan-e-ta.alīm se la.al-o-gohar tum ne

tumhīñ ne regzāroñ ke

mizājoñ ko badal Daalā

utāre haiñ tumhīñ ne qāfile

ḳhush-rang phūloñ ke

jalā kar vahshatoñ kī shaam meñ qindīl-e-āgāhī

jahālat ke barahna jism ko ilm-o-hunar ke

pairāhan baḳhshe

qadāmat ke añdheroñ se nikālā qaum ko tum ne

tamaddun ke charāġhoñ ko jalāyā qarya qarya bastī bastī

hind ke ghar ghar meñ tum ne raushnī bhar dī

bahae ilm ke dariya

sarabon ko haqiqat di

guman ki raat ne pai

yaqin ki raushni tum se

tumhaari fikr ne bang-e-dara ban kar

jagaya soe hue zehnon ko

rahe koshan

ki ho talim-e-niswan aam millat mein

har firqe mein ghar aangan mein aanchal mein

simaT aae nai tahzib

jin mein parwarish pae hue phulon ki

KHushbu ko zamane ke muqabil faKHr se rakh kar

karen hindostan ka nam uncha

ye maqsad tha tumhaari zindagi ka

tumhin ne hath rakkha nabz-e-dauran par

bane tiryak is zahr-e-halahil ka

jahaalat ki rag-o-pai mein jo gardish kar raha tha

rakha talim ke dast-e-hinai par charaghon ko

banaya aanchalon se parcham-e-fath-o-zafar tum ne

luTae maKHzan-e-talim se lal-o-gohar tum ne

tumhin ne regzaron ke

mizajon ko badal Dala

utare hain tumhin ne qafile

KHush-rang phulon ke

jala kar wahshaton ki sham mein qindil-e-agahi

jahaalat ke barahna jism ko ilm-o-hunar ke

pairahan baKHshe

qadamat ke andheron se nikala qaum ko tum ne

tamaddun ke charaghon ko jalaya qarya qarya basti basti

hind ke ghar ghar mein tum ne raushni bhar di