ek qissa-go ka qatl

din Dhalā

shaam huī

shahr-e-nā-pursāñ kī manhūs ghaḌī

qissa-go qatl huā shaam huī

surḳh īñToñ kī havelī ki baḌī dilkash thī

aaj tārāj huī

ek ilzām thā gustāḳhī kā

aur balvā.ī hazāroñ meñ

vahāñ ḳhuun kī bū sūñghte aa pahuñche the

lashkarī apnī kamīñ-gāhoñ meñ mahfūz khaḌe hañste the

gurg-e-āvāra ko ik luqma-e-tar Dālte the

surḳh īñToñ kī havelī meñ naqab lagtā thā

chob-dāroñ ko nayā hukm ye thā

is qadar zor se naqqārā baje

koī bhī chīḳh

koī aah

samā'at ke qarīb aa na sake

ḳhilqat-e-shahr ki āzurda-o-bīmār-o-nahīf

apnī qismat pe bas afsos kiyā kartī thī

haañ kisī ko bhī ye mā'lūm na thā

shahr-e-nā-pursāñ kī āshob-zada galiyoñ meñ

vaqt kī dhuul jamegī

to ka.ī qissa-go

is kahānī ko phir ik baar sunāne ke liye utreñge

shahr-e-nā-pursāñ kī manhūs ghaḌī

qissa-go qatl huā

shaam huī

din Dhala

sham hui

shahr-e-na-pursan ki manhus ghaDi

qissa-go qatl hua sham hui

surKH inTon ki haweli ki baDi dilkash thi

aaj taraj hui

ek ilzam tha gustaKHi ka

aur balwai hazaron mein

wahan KHun ki bu sunghte aa pahunche the

lashkari apni kamin-gahon mein mahfuz khaDe hanste the

gurg-e-awara ko ek luqma-e-tar Dalte the

surKH inTon ki haweli mein naqab lagta tha

chob-daron ko naya hukm ye tha

is qadar zor se naqqara baje

koi bhi chiKH

koi aah

sama'at ke qarib aa na sake

KHilqat-e-shahr ki aazurda-o-bimar-o-nahif

apni qismat pe bas afsos kiya karti thi

han kisi ko bhi ye ma'lum na tha

shahr-e-na-pursan ki aashob-zada galiyon mein

waqt ki dhul jamegi

to kai qissa-go

is kahani ko phir ek bar sunane ke liye utrenge

shahr-e-na-pursan ki manhus ghaDi

qissa-go qatl hua

sham hui