ek raat aaegi

mujhe hai aaj bhī ehsās apne maazī kā

base hue haiñ vo jalve mirī nigāhoñ meñ

huā hai sahl mujhe apnī zindagī kā safar

tumhārī yaad se vo raushnī hai rāhoñ meñ

mirī hayāt bhalā kaise bhuul saktī hai

mujhe tumhārī mohabbat ne jo maqām diyā

tasavvurāt kī bazm-e-nashāt meñ kho kar

tumhīñ ne mehr-o-vafā kā mujhe payām diyā

maiñ jāntā huuñ ki ai jān-e-e'tibār-e-vafā

tumhīñ ne mere liye ashk bhī bahā.e haiñ

tumhīñ ne merī umañgoñ kī rahnumā.ī kī

tumhīñ ne merī Dagar meñ diye jalā.e haiñ

tumhīñ qarīb raheñ mere talḳh lamhoñ meñ

tumhīñ ne gardish-e-daurāñ meñ haath thaam liyā

magar ye sach hai mirī jaan maiñ ne har lamha

tumheñ ko yaad kiyā aur tumhārā naam liyā

mirī vafā meñ koī farq aa sakā na kabhī

magar sila na milā ashk-e-ġham bahāne kā

taḌap taḌap ke guzārī hai zindagī maiñ ne

mujhe kabhī na milā vaqt muskurāne kā

mirā sukūñ mirā sabr-o-qarār chhīn liyā

mire nasīb kī bargashtagī ko kyā kahiye

tamām-umr mirī rahguzar pe chhā.ī rahī

ġham-e-hayāt kī us tīrgī ko kyā kahiye

magar yaqīn karo ek raat aa.egī

laboñ pe sham-e-tabassum jalā.eñge ham bhī

fareb-e-ahd-e-sitam do-ghaḌī kā mehmāñ hai

phir apnī bazm-e-tamannā sajā.eñge ham bhī

mujhe hai aaj bhi ehsas apne mazi ka

base hue hain wo jalwe meri nigahon mein

hua hai sahl mujhe apni zindagi ka safar

tumhaari yaad se wo raushni hai rahon mein

meri hayat bhala kaise bhul sakti hai

mujhe tumhaari mohabbat ne jo maqam diya

tasawwuraat ki bazm-e-nashat mein kho kar

tumhin ne mehr-o-wafa ka mujhe payam diya

main jaanta hun ki ai jaan-e-e'tibar-e-wafa

tumhin ne mere liye ashk bhi bahae hain

tumhin ne meri umangon ki rahnumai ki

tumhin ne meri Dagar mein diye jalae hain

tumhin qarib rahen mere talKH lamhon mein

tumhin ne gardish-e-dauran mein hath tham liya

magar ye sach hai meri jaan main ne har lamha

tumhein ko yaad kiya aur tumhaara nam liya

meri wafa mein koi farq aa saka na kabhi

magar sila na mila ashk-e-gham bahane ka

taDap taDap ke guzari hai zindagi main ne

mujhe kabhi na mila waqt muskurane ka

mera sukun mera sabr-o-qarar chhin liya

mere nasib ki bargashtagi ko kya kahiye

tamam-umr meri rahguzar pe chhai rahi

gham-e-hayat ki us tirgi ko kya kahiye

magar yaqin karo ek raat aaegi

labon pe sham-e-tabassum jalaenge hum bhi

fareb-e-ahd-e-sitam do-ghaDi ka mehman hai

phir apni bazm-e-tamanna sajaenge hum bhi