ek sawal

qissa hai ye do saal pahle kā

ik ma.asūm sī bachchī ke bachpane kā

pūchhā mujh se beTī kī beTī ne

ya.anī pyārī sī ik navāsī ne

naanū kabhī jāḌoñ meñ kabhī garmī meñ

aur kabhī tez mūslā-dhār bārish meñ

kyā kyā kahāniyāñ aap mujhe sunātī haiñ

sunte sunte maiñ kabhī so jaatī huuñ

kabhī mahv-e-hairat banī taḳhayyul meñ kho jaatī huuñ

merā nanhā sā zehn māyūs sā rah jaatā hai

qissa-e-yūsuf kī zuleḳhā to bilkul hī bhātī nahīñ

haañ yūsuf kī mohabbat meñ un ke baabā kā ronā dil dukhātā hai

kashtī-e-nūh meñ jānvaroñ kā hujūm uf allāh

muusā kī chhaḌī saañp ban jaanā bahut Darātā hai

aaj mausam to baḌā garm hai aur bijlī bhī gul

maiñ aaj aap se ik savāl pūchhtī huuñ naanū

duniyā gar na ghūmtī to ye mausam-e-garmā kaise aatā

baaġh meñ phūloñ kī bahār sardiyoñ meñ hī kyoñ aatī hai

jannat kā manzar to baḌā ḳhushnumā batāyā aap ne

allāh to baḌā rahīm-o-karīm hai to phir jahannum kyoñ banā.ī

justujū hai ye mujhe ki ādam-o-havvā jo duniyā meñ aa.e

kaun sī rut chal rahī thī aur kaun sā thā mausam

zamīñ tap rahī thī yā sardiyoñ kī thī ThanDī raat

chal rahī thī patjhaḌ kī garm havā.eñ yā thā sarsabz mausam-e-barsāt

soch kar mere in savāloñ kā javāb batā.eñ

tab phir aap is qissa ko aage baḌhā.eñ

in qissoñ kī haqīqat meñ maiñ bahut kho jaatī huuñ

isī liye T v khol rangīniyoñ meñ gum ho jaatī huuñ

qissa hai ye do sal pahle ka

ek masum si bachchi ke bachpane ka

puchha mujh se beTi ki beTi ne

yani pyari si ek nawasi ne

nanu kabhi jaDon mein kabhi garmi mein

aur kabhi tez musla-dhaar barish mein

kya kya kahaniyan aap mujhe sunati hain

sunte sunte main kabhi so jati hun

kabhi mahw-e-hairat bani taKHayyul mein kho jati hun

mera nanha sa zehn mayus sa rah jata hai

qissa-e-yusuf ki zuleKHa to bilkul hi bhati nahin

han yusuf ki mohabbat mein un ke baba ka rona dil dukhata hai

kashti-e-nuh mein jaanwaron ka hujum uf allah

musa ki chhaDi sanp ban jaana bahut Daraata hai

aaj mausam to baDa garm hai aur bijli bhi gul

main aaj aap se ek sawal puchhti hun nanu

duniya gar na ghumti to ye mausam-e-garma kaise aata

bagh mein phulon ki bahaar sardiyon mein hi kyon aati hai

jannat ka manzar to baDa KHushnuma bataya aap ne

allah to baDa rahim-o-karim hai to phir jahannum kyon banai

justuju hai ye mujhe ki aadam-o-hawwa jo duniya mein aae

kaun si rut chal rahi thi aur kaun sa tha mausam

zamin tap rahi thi ya sardiyon ki thi ThanDi raat

chal rahi thi patjhaD ki garm hawaen ya tha sarsabz mausam-e-barsat

soch kar mere in sawalon ka jawab bataen

tab phir aap is qissa ko aage baDhaen

in qisson ki haqiqat mein main bahut kho jati hun

isi liye T w khol ranginiyon mein gum ho jati hun