ek shaer dost se

ghar meñ baiThe hue kyā likhte ho

bāhar niklo

dekho kyā haal hai duniyā kā

ye kyā aalam hai

suunī āñkheñ haiñ

sabhī ḳhushiyoñ se ḳhālī jaise

aao in āñkhoñ meñ ḳhushiyoñ kī chamak ham likh deñ

ye jo māthe haiñ

udāsī kī lakīroñ ke tale

aao in māthoñ pe qismat kī damak ham likh deñ

chehroñ se gahrī ye māyūsī miTā ke

aao

in pe ummīd kī ik ujlī kiran ham likh deñ

duur tak jo hameñ vīrāne nazar aate haiñ

aao vīrānoñ par ab ek chaman ham likh deñ

lafz-dar-lafz samundar sā bahe

mauj-ba-mauj

bahr-e-naġhmāt meñ

har koh-e-sitam hal ho jaa.e

duniyā duniyā na rahe ek ġhazal ho jaa.e

ghar mein baiThe hue kya likhte ho

bahar niklo

dekho kya haal hai duniya ka

ye kya aalam hai

suni aankhen hain

sabhi KHushiyon se KHali jaise

aao in aankhon mein KHushiyon ki chamak hum likh den

ye jo mathe hain

udasi ki lakiron ke tale

aao in mathon pe qismat ki damak hum likh den

chehron se gahri ye mayusi miTa ke

aao

in pe ummid ki ek ujli kiran hum likh den

dur tak jo hamein virane nazar aate hain

aao viranon par ab ek chaman hum likh den

lafz-dar-lafz samundar sa bahe

mauj-ba-mauj

bahr-e-naghmat mein

har koh-e-sitam hal ho jae

duniya duniya na rahe ek ghazal ho jae