ek sham

nadī ke larazte hue pāniyoñ par

thiraktī huī shoḳh kirnoñ ne chiñgāriyāñ ghol dī haiñ

thakī dhuup ne aa ke lahroñ kī phailī huī nañgī bāñhoñ pe apnī laTeñ khol dī haiñ

ye jū-e-ravāñ hai

ki bahte hue phuul haiñ jin kī ḳhushbueñ gītoñ kī siskāriyāñ haiñ

ye pighle hue zard tāñbe kī chādar pe uljhī huī silvaTeñ haiñ

ki zanjīr-hā-e-ravāñ haiñ

bas ik shor-e-tūfāñ

kinārā na sāhil

nigāhoñ kī had tak

salāsil salāsil

ki jin ko uThā.e hue Doltī pankhuḌiyoñ ke safīne bahe jā rahe haiñ

bahe jā rahe haiñ

kahīñ duur in ghor añdheroñ meñ jo fāsloñ kī ridā.eñ lapeTe khaḌe haiñ

jahāñ par abad kā kinārā hai aur ik vo gaañv

vo ganne ke kyāroñ pe aatī huī Daak gaaḌī ke bhore dhueñ kī chhichhaltī sī chhāñv

nadi ke larazte hue paniyon par

thirakti hui shoKH kirnon ne chingariyan ghol di hain

thaki dhup ne aa ke lahron ki phaili hui nangi banhon pe apni laTen khol di hain

ye ju-e-rawan hai

ki bahte hue phul hain jin ki KHushbuen giton ki siskariyan hain

ye pighle hue zard tanbe ki chadar pe uljhi hui silwaTen hain

ki zanjir-ha-e-rawan hain

bas ek shor-e-tufan

kinara na sahil

nigahon ki had tak

salasil salasil

ki jin ko uThae hue Dolti pankhuDiyon ke safine bahe ja rahe hain

bahe ja rahe hain

kahin dur in ghor andheron mein jo faslon ki ridaen lapeTe khaDe hain

jahan par abad ka kinara hai aur ek wo ganw

wo ganne ke kyaron pe aati hui Dak gaDi ke bhore dhuen ki chhichhalti si chhanw