ek shabih

kuchh dinoñ se qarīb-e-dil hai vo din

jab achānak usī jagah ik shakl

merī āñkhoñ meñ muskurā.ī thī

ek pal ke liye to ek vo shakl

jaane kyā kuchh thī jhuuT bhī sach bhī

shāyad ik bhuul shāyad ik pahchān

kuchh dinoñ se to jān-būjh ke ab

ye samajhne lagā huuñ maiñ hī to huuñ

jis kī ḳhātir ye aks ubhrā hai

kuchh dinoñ se to ab maiñ dānista

is gumāñ kā fareb khātā huuñ

roz ik shakl us dorāhe par

ab mirā intizār kartī hai

ek dīvār se lagī har sub.h

TikTikī bāñdhe nīm-ruḳh yaksū

ab mirā intizār kartī hai

maiñ guzartā huuñ mujh ko dekhtī hai

maiñ nahīñ dekhtā vo dekhtī hai

us ke chehre kī sāḳht sā.at-e-dīd

zard hoñToñ kī patriyāñ pītal

surḳh āñkhoñ kī TukḌiyāñ qurmuz

roġhnī dhuup meñ dhañste hue paañv

muntazir muntazir udaas udaas

ik yahī chehra ek pal ke liye

jaane kyā kuchh thā lekin ab to mujhe

apnī ye bhuul bhūltī hī nahīñ

ek din ye shabīh dekhī thī

kuchh dinoñ se qarīb-e-dil hai vo din

kuchh dinoñ se to bīt.te hue din

usī ik din meñ Dhalte jaate haiñ

din guzarte haiñ ab to yuuñ jaise

umr us din kā ek hissa hai

umr guzrī ye din nahīñ guzrā

jis taraf jā.ūñ jis taraf dekhūñ

mujh se ojhal bhī mire sāmne bhī

shakl ik Tiin ke varaq pe rahī

shakl ik dil ke chaukhaTe meñ rahī

kuchh dinon se qarib-e-dil hai wo din

jab achanak usi jagah ek shakl

meri aankhon mein muskurai thi

ek pal ke liye to ek wo shakl

jaane kya kuchh thi jhuT bhi sach bhi

shayad ek bhul shayad ek pahchan

kuchh dinon se to jaan-bujh ke ab

ye samajhne laga hun main hi to hun

jis ki KHatir ye aks ubhra hai

kuchh dinon se to ab main danista

is guman ka fareb khata hun

roz ek shakl us dorahe par

ab mera intizar karti hai

ek diwar se lagi har subh

TikTiki bandhe nim-ruKH yaksu

ab mera intizar karti hai

main guzarta hun mujh ko dekhti hai

main nahin dekhta wo dekhti hai

us ke chehre ki saKHt saat-e-did

zard honTon ki patriyan pital

surKH aankhon ki TukDiyan qurmuz

roghni dhup mein dhanste hue panw

muntazir muntazir udas udas

ek yahi chehra ek pal ke liye

jaane kya kuchh tha lekin ab to mujhe

apni ye bhul bhulti hi nahin

ek din ye shabih dekhi thi

kuchh dinon se qarib-e-dil hai wo din

kuchh dinon se to bitte hue din

usi ek din mein Dhalte jate hain

din guzarte hain ab to yun jaise

umr us din ka ek hissa hai

umr guzri ye din nahin guzra

jis taraf jaun jis taraf dekhun

mujh se ojhal bhi mere samne bhi

shakl ek Tin ke waraq pe rahi

shakl ek dil ke chaukhaTe mein rahi