ek shajar

ik shajar mujh se yuuñ huā goyā

aap merī lazzat ke mā'nī jānte haiñ kyā

maiñ ye bolā nahīñ batāo tum

phir vo bolā suno mirī rūdād

maiñ to aisā shajar huuñ sāya-dār

jis ke dāman meñ saiñkaḌoñ panchhī

shaam Dhalte hī

rozānā hī aa ke sote haiñ

chain se aksar

aur thake haare ajnabī raahī

mujh se mil kar sukūn paate haiñ

mere saa.e meñ gungunāte haiñ

giit gaate haiñ pyaar ke aksar

aur bahut se sharāratī bachche

jaane pahchāne aur bahut se log

mujh se bole baġhair hī mujh par

sañgsārī se mere māthe ko

surḳh-rū banāte haiñ

us kī 'evaz meñ hamesha hī

apne phūloñ kī barshgālī se

apnī hastī ke saare samroñ ko

un kī āmad-o-ḳhair-maqdam meñ

ḳhud-baḳhud baḌh ke pesh kartā huuñ

choTeñ khā ke hañstā huuñ

un pe jaañ chhiḌaktā huuñ

hañs ke jiitā huuñ

hañs ke martā huuñ

phir bhī vo

mujh ko chhoḌ jaate haiñ

aur maiñ

intizār kartā huuñ

un ke lauT aane kā

haath meñ liye patthar

aap merī lazzat ke

mā'nī jaan lo ab to

intizār lazzat hai

zaḳhm hī masarrat hai

maiñ ne ye hī samjhā hai

maiñ ne ye hī samjhā hai

maiñ ne ye hī jaanā hai

merā diin ulfat hai

merā farz ḳhidmat hai

zindagī shahādat hai

kā.enāt vahdat hai

'ishq hī 'ibādat hai

har karam se lazzat hai

har sitam meñ lazzat hai

aap merī lazzat ke

mā'nī jaan kar ab to

kyā mujhe navāzeñge

mere paas ā.eñge

haath meñ liye patthar

haath meñ liye patthar

maiñ kyā javāb duuñ us ko

mere haath ḳhālī haiñ

us ke lab savālī haiñ

ek shajar mujh se yun hua goya

aap meri lazzat ke ma'ni jaante hain kya

main ye bola nahin batao tum

phir wo bola suno meri rudad

main to aisa shajar hun saya-dar

jis ke daman mein sainkaDon panchhi

sham Dhalte hi

rozana hi aa ke sote hain

chain se aksar

aur thake haare ajnabi rahi

mujh se mil kar sukun pate hain

mere sae mein gungunate hain

git gate hain pyar ke aksar

aur bahut se shararati bachche

jaane pahchane aur bahut se log

mujh se bole baghair hi mujh par

sangsari se mere mathe ko

surKH-ru banate hain

us ki 'ewaz mein hamesha hi

apne phulon ki barshgali se

apni hasti ke sare samron ko

un ki aamad-o-KHair-maqdam mein

KHud-baKHud baDh ke pesh karta hun

choTen kha ke hansta hun

un pe jaan chhiDakta hun

hans ke jita hun

hans ke marta hun

phir bhi wo

mujh ko chhoD jate hain

aur main

intizar karta hun

un ke lauT aane ka

hath mein liye patthar

aap meri lazzat ke

ma'ni jaan lo ab to

intizar lazzat hai

zaKHm hi masarrat hai

main ne ye hi samjha hai

main ne ye hi samjha hai

main ne ye hi jaana hai

mera din ulfat hai

mera farz KHidmat hai

zindagi shahadat hai

kaenat wahdat hai

'ishq hi 'ibaadat hai

har karam se lazzat hai

har sitam mein lazzat hai

aap meri lazzat ke

ma'ni jaan kar ab to

kya mujhe nawazenge

mere pas aaenge

hath mein liye patthar

hath mein liye patthar

main kya jawab dun us ko

mere hath KHali hain

us ke lab sawali hain