ek shararat

mirī hayāt kā mehvar chhupā huā hai kahāñ

mujhe vujūd meñ laayā hai kaun kis ke liye

jo kaam maiñ ne kiye aaj tak

fuzūl se the

kahīñ hayāt ke mā'nī nazar nahīñ aate

kahīñ hayāt kā maqsad nazar nahīñ aatā

janam se maut kā vaqfa vujūd kā partav

hazāroñ ḳhvāb jagā.e hue tasavvur meñ

'ajīb karb se labrez apnī zaat liye

bhaTak rahā hai ḳhalā meñ

azal se aise hī

baġhair mā'nī-o-maqsad balā kā shor liye

nahīf paikar-e-hastī ḳhizāñ-rasīda hai

mirī hayāt kā maqsad agar chunīda hai

rahā vo kis liye maḳhfī

'ajab tamāshā hai

husūl-e-zīst se kyoñ 'nūr' nā-shanāsā hai

baqā kī raah yahāñ duur tak nadārad hai

har ek lamha yahāñ maut se 'ibārat hai

mire vujūd kā ehsās kyā sharārat hai

meri hayat ka mehwar chhupa hua hai kahan

mujhe wujud mein laya hai kaun kis ke liye

jo kaam main ne kiye aaj tak

fuzul se the

kahin hayat ke ma'ni nazar nahin aate

kahin hayat ka maqsad nazar nahin aata

janam se maut ka waqfa wujud ka partaw

hazaron KHwab jagae hue tasawwur mein

'ajib karb se labrez apni zat liye

bhaTak raha hai KHala mein

azal se aise hi

baghair ma'ni-o-maqsad bala ka shor liye

nahif paikar-e-hasti KHizan-rasida hai

meri hayat ka maqsad agar chunida hai

raha wo kis liye maKHfi

'ajab tamasha hai

husul-e-zist se kyon 'nur' na-shanasa hai

baqa ki rah yahan dur tak nadarad hai

har ek lamha yahan maut se 'ibarat hai

mere wujud ka ehsas kya shararat hai