ek shauhar ka taaruf

vo sitam-ījād hai vo bānī-e-be-dād hai

hasratoñ kā ḳhuun kartā hai baḌā jallād hai

be-muravvat nāvak-afgan kā koī kyā de nishān

naam us be-dard kā mash.hūr ab sayyād hai

daam be-dāna kā phailātā hai aise jaa'l se

tā.ir-e-dil aa ke ḳhud phañstā hai vo sayyād hai

zab.h kar Daalā kisī ko nīm-bismil kar diyā

koī tanhā hai qafas meñ band ḳhud āzād hai

kund ho kitnī chhurī ruk ruk ke gardan par chale

hukm hai lekin na sunñe paa.eñ ham fariyād hai

barg-e-gul ko rauñd Daalā jab ḳhirām-e-nāz se

bulbuleñ chillā uThīñ fariyād hai fariyād hai

zulm be-andāz kartā hai na.e andāz se

phir maza ye hai asīroñ ko usī kī yaad hai

chaal us kī koī shātir tak samajh saktā nahīñ

kahte haiñ sab apne fan kā ek hī ustād hai

dil meñ kuchh isyāñ kā khaTkā hai na ḳhauf-e-bāġhbāñ

aur turra hai ki hathkandoñ pe apne shaad hai

hukmrāñ fazl-e-ḳhudā se ik vasī.a gulshan kā hai

rahmat-e-bārī hai nāzil har tarah ābād hai

naġhma-sanjī hotī hai aksar to is hasrat ke saath

vo mubārak haiñ ki jin par mehrbāñ sayyād hai

ham-safīroñ se hayā maane hai arz-e-hāl se

sab kaheñge qaid meñ kitnī zabāñ āzād hai

koī kyoñ ham-jins ke zulm-o-tashaddud par kuḌhe

varna rūdād-e-qafas ham ko sire se yaad hai

ek dil aur mushkileñ itnī ki mushkil hai bayāñ

yā-alī āsān kyūñkar hoñ dam-e-imdād hai

qaid-e-ġham se murġh-e-dil ko kījiye jaldī rihā

be-tarah ab 'mīm' kā muztar dil-e-nāshād hai

wo sitam-ijad hai wo bani-e-be-dad hai

hasraton ka KHun karta hai baDa jallad hai

be-murawwat nawak-afgan ka koi kya de nishan

nam us be-dard ka mashhur ab sayyaad hai

dam be-dana ka phailata hai aise ja'l se

tair-e-dil aa ke KHud phansta hai wo sayyaad hai

zabh kar Dala kisi ko nim-bismil kar diya

koi tanha hai qafas mein band KHud aazad hai

kund ho kitni chhuri ruk ruk ke gardan par chale

hukm hai lekin na sunne paen hum fariyaad hai

barg-e-gul ko raund Dala jab KHiram-e-naz se

bulbulen chilla uThin fariyaad hai fariyaad hai

zulm be-andaz karta hai nae andaz se

phir maza ye hai asiron ko usi ki yaad hai

chaal us ki koi shatir tak samajh sakta nahin

kahte hain sab apne fan ka ek hi ustad hai

dil mein kuchh isyan ka khaTka hai na KHauf-e-baghban

aur turra hai ki hathkandon pe apne shad hai

hukmran fazl-e-KHuda se ek wasia gulshan ka hai

rahmat-e-bari hai nazil har tarah aabaad hai

naghma-sanji hoti hai aksar to is hasrat ke sath

wo mubarak hain ki jin par mehrban sayyaad hai

ham-safiron se haya mane hai arz-e-haal se

sab kahenge qaid mein kitni zaban aazad hai

koi kyon ham-jins ke zulm-o-tashaddud par kuDhe

warna rudad-e-qafas hum ko sire se yaad hai

ek dil aur mushkilen itni ki mushkil hai bayan

ya-ali aasan kyunkar hon dam-e-imdad hai

qaid-e-gham se murgh-e-dil ko kijiye jaldi riha

be-tarah ab 'mim' ka muztar dil-e-nashad hai