ek tassur

ḳhāmoshī hamesha se utnī hī gahrī hai

jitnī ki canvas se māvarā tasvīr

tum aisā nahīñ samajhte kyaa?

āñkheñ jo hameñ dī ga.ī haiñ

kisī anāḌī musavvir ki ghaḌī huī aag ke

shola-e-siyāh ke bil-muqābil

kaafī haiñ nazar-andāz karne ke liye har chiiz ko

jo zāhir hai rañgīnī ke saath

ye aalā darje kī sanjīdgī hai

ek mukammal dimāġh ki fauqul-hāfiza gahrā.ī kā motī

siyāh raḳhshanda aur muhīb!

tasvīr-e-nā-shuda timsāl

kabhī nahīñ Tiktī us aa.ine kī phisalavāñ satah par

jo ḳhud aks hai kisī aur ā.īne meñ

puurī mahārat se

intihā.ī himāqat se

nahīñ, maiñ nahīñ dekh saktā vo ġhair-manqūta nuqta

jo kashf se ariiz hai aur murāqabe se vasī.a!

ab lāzim hai ki tasvīr kiye jaa.eñ

ḳhāmoshī ki tah aag kā bātin aur

muqaddas tanhā.ī!

to kahāñ hai tumhārā barush?

KHamoshi hamesha se utni hi gahri hai

jitni ki canwas se mawara taswir

tum aisa nahin samajhte kya?

aankhen jo hamein di gai hain

kisi anaDi musawwir ki ghaDi hui aag ke

shola-e-siyah ke bil-muqabil

kafi hain nazar-andaz karne ke liye har chiz ko

jo zahir hai rangini ke sath

ye aala darje ki sanjidgi hai

ek mukammal dimagh ki fauqul-hafiza gahrai ka moti

siyah raKHshanda aur muhib!

taswir-e-na-shuda timsal

kabhi nahin Tikti us aaine ki phisalawan satah par

jo KHud aks hai kisi aur aaine mein

puri mahaarat se

intihai himaqat se

nahin, main nahin dekh sakta wo ghair-manquta nuqta

jo kashf se ariz hai aur muraqabe se wasia!

ab lazim hai ki taswir kiye jaen

KHamoshi ki tah aag ka baatin aur

muqaddas tanhai!

to kahan hai tumhaara barush?