ek taswir-e-rang

maiñ ne jis vaqt tujhe pahle-pahal dekhā thā

tū javānī kā koī ḳhvāb nazar aa.ī thī

husn kā naġhma-e-javed huī thī ma.alūm

ishq kā jazb-e-betāb nazar aa.ī thī

ai tarab-zār javānī kī pareshāñ titlī

tū bhī ik bū-e-giraftār hai ma.alūm na thā

tere jalvaoñ meñ bahāreñ nazar aatī thiiñ mujhe

tū sitam-ḳhūrda-e-idbār hai ma.alūm na thā

tere nāzuk se paroñ par ye zar-o-sīm kā bojh

terī parvāz ko āzād na hone degā

tū ne rāhat kī tamannā meñ jo ġham paalā hai

vo tirī ruuh ko ābād na hone degā

tū ne sarmā.e kī chhāñv meñ panapne ke liye

apne dil apnī mohabbat kā lahū bechā hai

din kī taz.īn-e-fasurda kā asāsa le kar

shoḳh rātoñ kī masarrat kā lahū bechā hai

zaḳhm-ḳhurda haiñ taḳhayyul kī uḌāneñ terī

tere gītoñ meñ tirī ruuh ke ġham palte haiñ

surmagīñ ā.ankhoñ meñ yuuñ hasrateñ lau detī haiñ

jaise vīrān mazāroñ pe diye julte haiñ

is se kyā fā.eda rañgīn libādoñ ke tale

ruuh jaltī rahe ghultī rahe pazhmurda rahe

hoñT hañste hoñ dikhāve ke tabassum ke liye

dil ġham-e-zīst se bojhal rahe āzurda rahe

dil kī taskīñ bhī hai āsā.ish-e-hastī kī dalīl

zindagī sirf zar-o-sīm kā paimāna nahīñ

ziist ehsās bhī hai shauq bhī hai dard bhī hai

sirf anfās kī tartīb kā afsāna nahīñ

umar bhar reñgte rahne se kahīñ behtar hai

ek lamha jo tirī ruuh meñ vus.at bhar de

ek lamha jo tire giit ko shoḳhī de de

ek lamha jo tirī lai meñ masarrat bhar de

main ne jis waqt tujhe pahle-pahal dekha tha

tu jawani ka koi KHwab nazar aai thi

husn ka naghma-e-jawed hui thi malum

ishq ka jazb-e-betab nazar aai thi

ai tarab-zar jawani ki pareshan titli

tu bhi ek bu-e-giraftar hai malum na tha

tere jalwaon mein bahaaren nazar aati thin mujhe

tu sitam-KHurda-e-idbar hai malum na tha

tere nazuk se paron par ye zar-o-sim ka bojh

teri parwaz ko aazad na hone dega

tu ne rahat ki tamanna mein jo gham pala hai

wo teri ruh ko aabaad na hone dega

tu ne sarmae ki chhanw mein panapne ke liye

apne dil apni mohabbat ka lahu becha hai

din ki tazin-e-fasurda ka asasa le kar

shoKH raaton ki masarrat ka lahu becha hai

zaKHm-KHurda hain taKHayyul ki uDanen teri

tere giton mein teri ruh ke gham palte hain

surmagin aaankhon mein yun hasraten lau deti hain

jaise viran mazaron pe diye julte hain

is se kya faeda rangin libaadon ke tale

ruh jalti rahe ghulti rahe pazhmurda rahe

honT hanste hon dikhawe ke tabassum ke liye

dil gham-e-zist se bojhal rahe aazurda rahe

dil ki taskin bhi hai aasaish-e-hasti ki dalil

zindagi sirf zar-o-sim ka paimana nahin

zist ehsas bhi hai shauq bhi hai dard bhi hai

sirf anfas ki tartib ka afsana nahin

umar bhar rengte rahne se kahin behtar hai

ek lamha jo teri ruh mein wusat bhar de

ek lamha jo tere git ko shoKHi de de

ek lamha jo teri lai mein masarrat bhar de