ek wasiyyat

donoñ hāthoñ meñ nañgī talvāreñ saunt kar

maiñ añdhere par TuuT paḌā

use TukḌe TukḌe kar denā chāhā

lekin us ne merā har vaar ḳhālī kar diyā

maiñ ne haath meñ bandūq uThā lī

aur us par dīvāna-vār goliyāñ barsāne lagā

sochā thaa, us kā jism chhalnī kar Dālūñgā

lekin us meñ ek bhī surāḳh na kar sakā

phir maiñ ne mish.al uThā lī

aur ek zabar-dast irāda liye aage baḌhā

chāhā thā us kā chehra jhulas dūñgā

aur use zinda jalā kar raakh kar dūñgā

mujhe yuuñ biphrā huā dekh

añdherā sahm kar pīchhe haT gayā

lekin dūsre hī lamhe

us ne zor se phūñk maar kar, mish.al bujhā dī

phir maiñ ne ek aur mansūba banāyā

chupke chupke ek surañg tayyār kī

lekin mujhe gumān bhī na thā

ki dyna-might ke fiite ko aag dikhāne se pahle

añdherā surañg meñ paanī bhar degā

aaj merī ruḳhsat kā vaqt aa pahuñchā hai

log!

jab koī nau-javān, añdhere ko lalkāre

to tum, use merī misāl na denā

donon hathon mein nangi talwaren saunt kar

main andhere par TuT paDa

use TukDe TukDe kar dena chaha

lekin us ne mera har war KHali kar diya

main ne hath mein banduq uTha li

aur us par diwana-war goliyan barsane laga

socha tha, us ka jism chhalni kar Dalunga

lekin us mein ek bhi suraKH na kar saka

phir main ne mishal uTha li

aur ek zabar-dast irada liye aage baDha

chaha tha us ka chehra jhulas dunga

aur use zinda jala kar rakh kar dunga

mujhe yun biphra hua dekh

andhera sahm kar pichhe haT gaya

lekin dusre hi lamhe

us ne zor se phunk mar kar, mishal bujha di

phir main ne ek aur mansuba banaya

chupke chupke ek surang tayyar ki

lekin mujhe guman bhi na tha

ki dyna-might ke fite ko aag dikhane se pahle

andhera surang mein pani bhar dega

aaj meri ruKHsat ka waqt aa pahuncha hai

log!

jab koi nau-jawan, andhere ko lalkare

to tum, use meri misal na dena