ek yaad ka rauzan

merī yādoñ meñ se ek yaad mujhe

tā-dam-e-marg nahīñ bhūlegī

merī is yaad kā rauzan darīcha hai jis meñ se mujhe

kitne guzre hue pal saaf nazar aate haiñ

kachchī miTTī ko jo taḳhtī pe chalā.ūñ to ye dhartī jaise

apnī ḳhushbū meñ mujhe nahlā.e

raushnā.ī meñ qalam ko jo Duubo duuñ

to mujhe roz-e-azal yaad aa.e

lafz likhūñ sar-e-qirtās

to phūloñ kī qatāreñ lag jaa.eñ

harf ke dā.ere sayyāre se bante jaa.eñ

aur nuqte vo chamakte hue taare

jo kabhī taire haiñ aur kabhī Dūbte haiñ

mere maazī kā ye rauzan mujhe dikhlātā hai har sū ġhunche

vo jo taḳhlīq ke mausam meñ chaTaḳhte haiñ

to har rañg ke dildār mafāhīm ke ambār se lag jaate haiñ

mere maazī kā ye vo rauzan hai

jis meñ jhāñkūñ to vahāñ

jhuTpuTe aur shafaq aur tilismī sī ulūhī sī ḳhamoshī kī fazā taarī hai

aur ik samt añdhere meñ damakte hue chehroñ kī nadī jaarī hai

ye vo manzar hai ki jo

ilm-o-mantiq ke sahīfoñ se ka.ī laakh gunā bhārī hai

meri yaadon mein se ek yaad mujhe

ta-dam-e-marg nahin bhulegi

meri is yaad ka rauzan daricha hai jis mein se mujhe

kitne guzre hue pal saf nazar aate hain

kachchi miTTi ko jo taKHti pe chalaun to ye dharti jaise

apni KHushbu mein mujhe nahlae

raushnai mein qalam ko jo Dubo dun

to mujhe roz-e-azal yaad aae

lafz likhun sar-e-qirtas

to phulon ki qataren lag jaen

harf ke daere sayyare se bante jaen

aur nuqte wo chamakte hue tare

jo kabhi taire hain aur kabhi Dubte hain

mere mazi ka ye rauzan mujhe dikhlata hai har su ghunche

wo jo taKHliq ke mausam mein chaTaKHte hain

to har rang ke dildar mafahim ke ambar se lag jate hain

mere mazi ka ye wo rauzan hai

jis mein jhankun to wahan

jhuTpuTe aur shafaq aur tilismi si uluhi si KHamoshi ki faza tari hai

aur ek samt andhere mein damakte hue chehron ki nadi jari hai

ye wo manzar hai ki jo

ilm-o-mantiq ke sahifon se kai lakh guna bhaari hai