ekta

suno aaj ye shā'ir-e-haq-navā

batātā hai kyā chiiz hai ektā

hai darmān-e-dard-e-vatan ektā

jamāl-e-bahār-e-chaman ektā

hai ye quvvat-e-dast-o-bāzū-e-qaum

hai ye ġhāza-e-rū-e-zebā-e-qaum

ye ‘uqda-kushā-e-hayāt-e-bashar

ye zulmat meñ paiġhām-e-nūr-e-sahar

ye har diin har dharm kī jaan hai

ye insāniyat kī nigahbān hai

jagātī hai har dam na.e valvale

baḌhātī hai insān ke hausle

masā.ib ke sho'le bujhātī hai ye

masarrat ke ġhunche khilātī hai ye

chhuḌātī hai ye dām-e-āzār se

bachātī hai kashtī ko mañjdhār se

barastī hai rahmat kī ban kar ghaTā

ye kartī hai qaumoñ ko tāqat 'atā

bayābāñ ko kartī hai ye lāla-zār

isī par taraqqī kā dār-o-madār

nahīñ hai guzar ektā kā jahāñ

vahāñ hai sukūñ aur na amn-o-amāñ

taraqqī na ārām-o-rāhat vahāñ

na san'at na hirfat na daulat vahāñ

batātī hai tārīḳh ham ko ye baat

ki aa.ī hai jab bhī tabāhī kī raat

vatan par kabhī jab musībat paḌī

thā is kā sabab ektā kī kamī

yahāñ jab farangī ne rakkhā qadam

to aapas meñ us vaqt laḌte the ham

na thā bhā.ī-chāra na thī ektā

jahālat meñ ham log the mubtalā

agar ek hote na luTtā chaman

na mahkūm hotā hamārā vatan

magar aaj bhī haiñ kuchh aise sharīr

haiñ dil jin ke tārīk murda zamīr

nahīñ chāhte haiñ jo amn-o-amāñ

tule haiñ jagāne pe fitne yahāñ

sunāte haiñ firqa-parastī kā raag

jalāte haiñ sīnoñ meñ nafrat kī aag

haiñ ye shar-pasand aur taḳhrīb-kār

hai ḳhatre meñ un se vatan kā vaqār

ye hai farz apnā ki un se bacheñ

na kuchh un kī bātoñ pe ham dhyān deñ

raheñ mil ke hindū musalmāñ sadā

diloñ meñ jagā.eñ ḳhulūs-o-vafā

ta'assub kī ātish bhaḌakne na deñ

'adāvat ke ḳhanjar chamakne na deñ

miTā deñ har ik naqsh-e-buġhz-o-'inād

zabānoñ pe ho nā'ra-e-ittihād

ye josh-o-ḳharosh-o-ba-'azm-e-javāñ

uTheñ bahr-e-tā'mīr-e-hindostāñ

qadam ko qadam se milāte hue

uḳhuvvat kā parcham uḌāte hue

vatan kī taraqqī kā sāmāñ kareñ

ḳhas-o-ḳhār ko bhī gulistāñ kareñ

suno aaj ye sha'ir-e-haq-nawa

batata hai kya chiz hai ekta

hai darman-e-dard-e-watan ekta

jamal-e-bahaar-e-chaman ekta

hai ye quwwat-e-dast-o-bazu-e-qaum

hai ye ghaza-e-ru-e-zeba-e-qaum

ye ‘uqda-kusha-e-hayat-e-bashar

ye zulmat mein paigham-e-nur-e-sahar

ye har din har dharm ki jaan hai

ye insaniyat ki nigahban hai

jagati hai har dam nae walwale

baDhati hai insan ke hausle

masaib ke sho'le bujhati hai ye

masarrat ke ghunche khilati hai ye

chhuDati hai ye dam-e-azar se

bachati hai kashti ko manjdhaar se

barasti hai rahmat ki ban kar ghaTa

ye karti hai qaumon ko taqat 'ata

bayaban ko karti hai ye lala-zar

isi par taraqqi ka dar-o-madar

nahin hai guzar ekta ka jahan

wahan hai sukun aur na amn-o-aman

taraqqi na aaram-o-rahat wahan

na san'at na hirfat na daulat wahan

batati hai tariKH hum ko ye baat

ki aai hai jab bhi tabahi ki raat

watan par kabhi jab musibat paDi

tha is ka sabab ekta ki kami

yahan jab farangi ne rakkha qadam

to aapas mein us waqt laDte the hum

na tha bhai-chaara na thi ekta

jahaalat mein hum log the mubtala

agar ek hote na luTta chaman

na mahkum hota hamara watan

magar aaj bhi hain kuchh aise sharir

hain dil jin ke tarik murda zamir

nahin chahte hain jo amn-o-aman

tule hain jagane pe fitne yahan

sunate hain firqa-parasti ka rag

jalate hain sinon mein nafrat ki aag

hain ye shar-pasand aur taKHrib-kar

hai KHatre mein un se watan ka waqar

ye hai farz apna ki un se bachen

na kuchh un ki baaton pe hum dhyan den

rahen mil ke hindu musalman sada

dilon mein jagaen KHulus-o-wafa

ta'assub ki aatish bhaDakne na den

'adawat ke KHanjar chamakne na den

miTa den har ek naqsh-e-bughz-o-'inad

zabanon pe ho na'ra-e-ittihad

ye josh-o-KHarosh-o-ba-'azm-e-jawan

uThen bahr-e-ta'mir-e-hindostan

qadam ko qadam se milate hue

uKHuwwat ka parcham uDate hue

watan ki taraqqi ka saman karen

KHas-o-KHar ko bhi gulistan karen