election ki kar-farmai

mizāj-e-muqtadir majbūr kyoñ hai ham samajhte haiñ

bazāhir dil se naḳhvat duur kyoñ hai ham samajhte haiñ

karam kyoñ ho rahā hai ab nigāh-e-fitna-sāmāñ kā

tirī har baat ab manzūr kyoñ hai ham samajhte haiñ

jo kal kuchh aur the vo ab haiñ āzādī-pasandoñ meñ

unheñ taslīm ye dastūr kyoñ hai ham samajhte haiñ

vo insāñ jāma-e-kohna meñ jo malbūs rahtā thā

libās-e-nau meñ ab mastūr kyoñ hai ham samajhte haiñ

vo kyoñ pesh aa rahe haiñ aaj aḳhlāq-o-muravvat se

vo un kī tamkanat kāfūr kyoñ hai ham samajhte haiñ

udāsī chhā rahī hai kis liye 'in'ām' chehroñ par

parīda ruḳh kā rang-o-nūr kyoñ hai ham samajhte haiñ

mizaj-e-muqtadir majbur kyon hai hum samajhte hain

bazahir dil se naKHwat dur kyon hai hum samajhte hain

karam kyon ho raha hai ab nigah-e-fitna-saman ka

teri har baat ab manzur kyon hai hum samajhte hain

jo kal kuchh aur the wo ab hain aazadi-pasandon mein

unhen taslim ye dastur kyon hai hum samajhte hain

wo insan jama-e-kohna mein jo malbus rahta tha

libas-e-nau mein ab mastur kyon hai hum samajhte hain

wo kyon pesh aa rahe hain aaj aKHlaq-o-murawwat se

wo un ki tamkanat kafur kyon hai hum samajhte hain

udasi chha rahi hai kis liye 'in'am' chehron par

parida ruKH ka rang-o-nur kyon hai hum samajhte hain