الیکشن کی کار فرمائی

مزاج مقتدر مجبور کیوں ہے ہم سمجھتے ہیں

بظاہر دل سے نخوت دور کیوں ہے ہم سمجھتے ہیں

کرم کیوں ہو رہا ہے اب نگاہ فتنہ ساماں کا

تری ہر بات اب منظور کیوں ہے ہم سمجھتے ہیں

جو کل کچھ اور تھے وہ اب ہیں آزادی پسندوں میں

انہیں تسلیم یہ دستور کیوں ہے ہم سمجھتے ہیں

وہ انساں جامۂ کہنہ میں جو ملبوس رہتا تھا

لباس نو میں اب مستور کیوں ہے ہم سمجھتے ہیں

وہ کیوں پیش آ رہے ہیں آج اخلاق‌ و مروت سے

وہ ان کی تمکنت کافور کیوں ہے ہم سمجھتے ہیں

اداسی چھا رہی ہے کس لیے انعامؔ چہروں پر

پریدہ رخ کا رنگ و نور کیوں ہے ہم سمجھتے ہیں